Coas enerxías renovadas despois da primeira vitoria en preto de mes e medio, o Autos Cancela Zalaeta está listo para recibir ao segundo clasificado. O Extremadura Arroyo será o seguinte rival das coruñesas, nun encontro que terá lugar o sábado, 20 de marzo, ás 19:00 horas.
Este partido enmárcase na xornada 21ª da Superliga Femenina 2 (SF2), a penúltima desta competición regular. Actualmente, o Zalaeta ocupa a sétima posición, evitando as de descenso, nunha zona morna da táboa gañada a pulso en xornadas previas, pero que entrou en risco despois de semanas de malos resultados.
Con dous partidos por disputarse, as galegas dobran en puntos ás colistas, o Futura Center Arena Rivas, e cos seus 23 puntos, teñen un lixeiro colchón respecto aos equipos da zona baixa.
Máis distanciadas na clasificación están as extremeñas, as seguintes rivais do Zalaeta, que ocupan o posto de prata con 42 puntos, ao ter perdido só catro encontros, pero rascando un punto en dous deles.
Así, o partido ante o Extremadura Arroyo preséntase complicado para as galegas, que xogarán ante o segundo equipo con menos sets en contra. Ademais, chegan de realizar un pleno de sets no seu último encontro, ante o Arona Tenerife Sur.
O Barrio das Flores abrirá as portas de novo para que o Zalaeta siga sumando puntos e poida rematar a tempada coa tranquilidade de estar no medio da táboa.
Guzzi, no sete ideal tras a última vitoria
Neste encontro, nas filas do coxunto local destacará Eleonora Guzzi. A italiana foi declarada como unha das sete mellores xogadoras da última xornada, na que o Zalaeta venceu ao RGC Covadonga.
A central logrou realizar sete bloqueos en catro sets, polo que entra na lista das mellores bloqueadoras. Tamén está no top a súa compañeira Laura Vázquez, quen aparece entre as mellores sacadoras, con catro puntos directos.
