O Autos Cancela Zalaeta leva demasiadas xornadas sen puntuar e a tempada está nas xornadas finais. Pero todo podería cambiar esta fin de semana. As galegas reciben no Barrio das Flores ao RGC Covadonga, o sétimo clasificado, este sábado 13 ás 19:00 horas.
As herculinas xogarán en casa e ante o seu público contra un rival directo. As asturianas só están unha posición por riba das coruñesas, que con 20 puntos están no oitavo chanzo da Superliga Femenina 2 (SF2).
O Zalaeta non está no seu mellor momento. As xogadoras de A Coruña levan sen gañar desde xaneiro, pero as derrotas non poden coa súa moral. Decidido a reencontrarse coa vitoria nesta semana, o plantel dirixido por Jorge Barrero prepara este “derbi”.
Rivalidade Asturias – Galicia
A rivalidade e os enfrontamentos entre estes dous conxuntos son tan emocionantes e tensos, que xa merecen a calificación de derbi. A isto, súmase a necesidade que teñen ambos por gañar e afastar ás pantasmas que ameazan co descenso.
A igualdade sobre a pista será máxima. O Covadonga é un equipo que leva un balance de 29 sets a favor e 39 en contra, unhas cifras nas que tamén se moven as coruñesas, con 27 e 35 respectivamente.
Ademais, atendendo aos antecedentes deste duelo, a vitoria tamén está repartida. Estes dous conxuntos levan competindo entre si na SF2 desde o 2012, con nove vitorias para as galegas e sete para asturianas; a última, esta tempada no partido de ida (3-0).
Este será un encontro decisivo para a salvación de calquera dos dous clubs, por iso o Zalaeta apoiarase na súa afección, que poderá acudir ao Barrio.
Como conseguir as entradas?
Se estás interesada en acudir e vivir a emoción do voleibol en directo, deberás enviar un correo ata as 12:00 horas do sábado 13 á dirección administracion@voleibolzalaeta.gal.
Na mensaxe, indica os teus datos e os das persoas da túa mesma unidade de convivencia que desexen acudir a este duelo celebrado de novo ante o público.
Se non podes asistir, o Zalaeta retransmitirá o encontro vía streaming a través da súa canle de Youtube.
Ser afeccionada do Zalaeta pode ter premio
Máis aló dos resultados deportivos, seguir ao equipo galego pode traer premio. Como iniciativa para agradecer o apoio recibido nesta complicada tempada, o club de voleibol coruñés sortea as camisetas das súas líberos asinadas.
Para gañar hai dúas vías. A primeira, participando nun concurso de pancartas amosando o apoio ao equipo herculino. Deberás acudir con ela ao partido e subir unha foto a redes mencionando ao @cvzalaeta. A segunda é participando directamente no sorteo dun agasallo sorpresa coa entrada deste sábado.
Ver esta publicación en Instagram
