O CV Autos Cancela Zalaeta levaba xa cinco partidos seguidos sen vencer. Unha situación que empezaba a minar o ánimo e a complicar a clasificación das galegas. Pero a situación finalizou esta semana cun trunfo por 3-1 na súa cancha do Barrio das Flores da Coruña. A vítima das galegas foi o RGC Covadonga.
Aínda que o primeiro set se gañou dun xeito un chisco axustado, serviu para pór por diante ao Autos Cancela Zalaeta. O conxunto que adestra Jorge Barrero loitou para facerse con segundo set que, logo de moita disputa, acabou caendo do lado asturiano por 27-29.
Viuse na pista moita tensión e ansia por vencer. Na terceira manga o Autos Cancela Zalaeta reencontrouse co seu xogo, fíxose forte de ánimo e acadou un 25-20 co encarou con maior confianza o cuarto set, que sería o definitivo. Nesa cuarta manga, as galegas impuxéronse cun tanteo de 25-22 ao RGC Covadonga, que adestra o técnico Saúl Pérez.
Este resultado de 3-1 faille sumar ás herculinas tres puntos que as colocan sétimas na clasificación da Superliga Feminina 2, xustamente un posto por diante do RGC Covadonga, o seu rival desta xornada.
O Zala xoga de novo en casa á seguinte fin de semana
A vindeira xornada o Autos Cancela Zalaeta repite no pavillón polideportivo coruñés do Barrio das Flores como local. O seu seguinte partido está fixado para o sábdo 20 de marzo ás 19:00 horas recibindo ao conxunto do Extremadura Arroyo. Será un óso duro de roer xa que as extremeñas son as segundas clasificadas e chegan logo de vencer 3-0 ao Arona Tenerife Sur.
FICHA TÉCNICA
CV AUTOS CANCELA ZALAETA: Patricia Santos, Alba Quirós, Eleonora Guzzi, Laura Vázquez, Carla Figueroa, María Forteza – Rey – sexteto inicial -. Tamén xogaron: Claudia Gómez, Cris Bermejo,Paula Lorenzo, Andrea Rivas, Susana Suárez e Noemí Sánchez.
RGC COVADONGA: Mirian Diéguez, Marina Rubiera, Marina Blanco, Paula Lorenzana, Elena Rodríguez, Carla Margolles – sexteto inicial -. Tamén xogaron: Laura Sowerby, Ariana Moran, Ana Martín, Carmela Mitre, Sara García
PARCIAIS: 25/21, 27/29, 25/20 e 25/22.
ÁRBITRO: Francisco Barrallo Busto.
INCIDENCIAS: Partido correspondente á vixéxima xornada da Superliga feminina 2 do voleibol feminino estatal disputado no pavilllón polideportivo do Barrio das Flores da Coruña ante 50 espectadores (o aforo estaba limitado por mor das restricións de público en acontecementos deportivos que están vixentes en Galicia por mor da contención de contaxios de COVID-19).
