A Federación Galega de Voleibol e o Concello da Coruña presentaron ‘A Coruña é Volei Praia’, co anuncio dos tres torneos que se disputarán na cidade herculina no mes de agosto. Un deles é de ambito estatal e os outros dous autonómicos.
No acto, celebrado no salón de presentacións do Concello, estiveron presentes a concelleira de deportes, Mónica Martínez, e o presidente da federación, José Ángel Luna Bargo.
Na presentación, Martínez declarou como “o deporte convértese no mellor escaparate da nosa cidade”, ademais de reiterar o compromiso do goberno local con “manter o benestar das e dos coruñeses, facilitando a práctica do deporte saudable a través de programas como ‘Coruña no mar’ ou ‘Coruña en forma’, programas que están tendo un éxito enorme grazas tamén á responsabilidade das persoas participantes”.
Tres torneos en ‘A Coruña é volei praia’
O primeiro torneo iniciarase esta mesma fin de semana, levándose a cabo a III Proba do Circuíto Galego de Categorías Inferiores de Volei Praia, onde 240 pequenos/as desfrutarán da derradeira proba do seu calendario de Volei Praia 20/21 despois dun gran éxito de participación nas dúas competicións anteriores de Dumbría e Malpica. Esta proba organízase en colaboración co Club Calasancias.
A continuación, os días 14 e e 15 deste mesmo mes, terá lugar o Campionato Galego Senior de Volei Praia como parte do Circuíto Vichy Catalán Volei Praia Galego, coroando aos campións e campioas galegos/as da tempada 20/21 despois de dous días de competición nas categorías masculina e femenina. Neste torneo competirán un total de 96 deportistas, 40 delas mulleres.
Por último, dende o luns 16 ata o domingo 22, os mellores clubs de Volei Praia de España competirán tamén en Riazor co obxectivo de levar o título do Campeonato de España de Clubs de Voley Playa.
Esta será a primeira edición da proba que celebra na cidade de A Coruña e que mostrará o mellor Volei Praia nacional feminino e masculino, reunindo a case 300 participantes.
Protocolos sanitarios
Todos os eventos contarán cunha montaxe específica para cada unha das competicións deseñada en colaboración co Concello de A Coruña.
Ademáis tamén se seguirán protocolos COVID aprobados polas autoridades sanitarias e específicos da FGVB e a Real Federación Española de Voleibol para competición ao aire libre, velando así pola seguridade de tanto os participantes coma o público asistente aos eventos. A afección poderá seguir os partidos desde as bancadas e desde o Paseo Marítimo.
Desde o Concello informan de que durante o desenvolvemento dos campionatos e das actividades sinalizaranse correctamente as zonas de paso para evitar aglomeracións de persoas e controlar a fluidez na vía pública.
