O Victoria CF continúa en traxectoria ascendente esta tempada. Despois de pasar á segunda fase como segundas clasificadas, empatadas co Viajes Interrías, as cebras inician esta pelexa polo ascenso cunha vitoria ante o Gijón FF por un 2-1.
O partido prevíase como complicado, ante un conxunto asturiano que a adestradora local, Cris Oreiro, califica de “rudo” e que “viña pelexar”. Porén o cadro coruñés competiu ben “nos balóns aéreos” e sendo agresivas nos duelos. “Estamos moi contentos co rendemento do equipo. Se teño que poñer unha pega é que temos que estar máis acertadas a nivel de marcar goles”, resume a técnico.
Así foi o primeiro partido do Victoria CF na segunda fase
O equipo local saíu forte na primeira parte, na que xogaron case sen erros, pero non con todo o acerto necesario cara a portería. “No minuto 13 tivemos un un contra un que erramos, metamos gol, despois temos un erro defensivo que nos meten un gol, que pode pasar e volvemos poñernos por diante cun 2-1”, recorda Oreiro sobre os tantos de Alba no minuto 17 e de Paloma no 39.
As cebras tiveron a oportunidade de pechar a primeira parte cun contundente 3-1, pero non houbo sorte. Tras o descanso, repetiuse o esquema. “Tivemos un man a man no minuto 10, fallamos e como todo, cando fallas ocasións tan claras, entra a sensación de que te poden marcar e así foi a segunda parte”, explica a adestradora.
Revive no seguinte vídeo o partido entre o Victoria CF e Gijón FF dándolle ao play.
