Despois do duelo Sevilla – A Coruña na máxima categoría, o fútbol estatal trae otro enfrontamento con moito en xogo. As cebras do Victoria CF xóganse o ascenso á Reto Iberdrola ante o Real Betis B, este domingo, 20 de xuño, ás 11:00 horas, na Ciudad Deportiva Luis del Sol.
Este será o partido de volta do play off de promoción da Primera Nacional. No primeiro encontro, as andaluzas golpearon primeiro, nunha primeira parte igualadísima na que o gol non chegaría ata minutos antes do descanso.
Co 0-1 en contra, as coruñesas víronse arriba e presionaron ata forzar o empate cun gol de Charín no minuto 55. O duelo continuou cun nivel moi similar entre ambos conxuntos, cunhas táboas que non se desfixeron nin no tempo engadido. Este domingo, co Victoria CF xogando como visitante, as galegas darano todo para ascender de categoría.
O Victoria empata ante o Betis en casa e xógase o ascenso en Sevilla (1-1)
Moito en xogo para Victoria e Betis
O Real Betis B intentará cumprir o soño que non puido facer realidade a campaña pasada. No 2020, as andaluzas lograron ser campioas do grupo 4 de Primera Nacional e disputar o play off de ascenso, pero La Solana foi superior a elas cun 1-0 botando por terra a ilusión da promoción. Desta vez, intentarán cambiar o curso dos acontecementos xogando en casa.
Ademais, este mesmo sábado, o seu primeiro equipo, o Real Betis, certificou a permanencia na máxima categoría, a Primera Iberdrola, despois de derrotar ao coruñés Dépor ABANCA.
Pola contra, esta é a primeira vez que o Victoria CF está a vivir unha situación similar. A propia adestradora Cris Oreiro confesaba a As Nosas que o momento que están a vivir é algo histórico para o club, que nunca fora campión da liga regular, e moito menos disputara o play off.
