Oito equipos loitarán por ascender á Reto Iberdrola e as galegas do Victoria CF son un deles. As coruñesas deberán superar o play-off de promoción, no que o seu rival é o Real Betis.
O partido de ida celebrarase na fin de semana do 12 de 13 de xuño, co Victoria CF como equipo local, mentres que a volta será na seguinte, do 19 e 20. O vencedor ascenderá directamente.
Este mércores, 2 de xuño, a sede federativa da RFEF acolleu o sorteo dos emparellamentos que decidirán os catro equipos que ascendan desde a Primera Nacional á categoría de prata do fútbol español.
O seleccionador Pedro López, presente no sorteo
No sorteo estivo presente o seleccionador estatal sub19, Pedro López, quen felicitou aos clubs con opcións ao ascenso, asegurando que “poder disputar este play-off faite mellor como xogadora e como club”. Ademais, recalcou o alto nivel da Reto Iberdrola, que definiu como “de calidade con boas xogadoras e decisións tácticas”.
Sobre a convocatoria da Selección sub19, da que forma parte Eva Dios, o adestrador declarou que “é un premio por toda a tempada. As xogadoras son chamadas polos méritos que fixeron toda a tempada e ténse que sentir orgullosas”. O conxunto español disputará no 2022 o Europeo sub19 e o Mundial sub20.
O resto de emparellamentos para o play-off de Primera Nacional
Ademais do Victoria CF e o Real Betis, outros seis equipos xóganse o ascenso. Estes son os seus emparellamentos:
- Elche CF vs CFS La Garita
- CF Unión Viera vs CD Pradejón
- FC Levante Las Planas vs CD Getafe Femenino
