O Viaxes Amarelle FSF, que adestra o técnico Jorge Basanta, afrontaba un complicado duelo recibindo a visita do STV Roldán FSF. Pese a facer un gran partido sobre a cancha e aguantar o tipo diante dun rival moi complicado, o partido fóiselle ás galegas que, así e todo, loitaron por puntuar ata o último suspiro do encontro.
Pero por segunda semana consecutiva, o último minuto do partido quíxose facer decisivo para o Viaxes Amarelle. Nesta ocasión, o conxunto murciano adiantábase con dous goles no partido, mentres que as herculinas metían presión anotando o 1-2 a falta de 20 segundos. Buscaron o punto ata que o partido agonizou pero non foron quen de anotar o segundo tanto que lles tería dado un merecido punto as laranxas.
O partido iniciábase cun Viaxes Amarelle sacando de centro e buscando desde o primeiro minuto a portaría contraria. Aínda que segundo pasaban os minutos, o STV Roldán FSF íase facendo coa posesión do balón e xerando o xogo. Mentres, a escuadra herculina buscaba sorprender á contra ou con balóns longos ao pivote.
As coruñesas que prepara Jorge Basanta metíase nunha presión a media cancha que conseguía roubar o balón na transición, e xerar contras perigosas, pero sen conseguir finalizar coa suficiente claridade.
Sen cambios no electrónico ao final do primeiro tempo
O partido íase igualando segundo pasaban os minutos, e as ocasións repartíanse para ambas as escuadras; e algunhas das máis claras chegaban nos últimos minutos coa presión forte a media cancha das locais; pero o partido iríase ao tempo de descanso co 0-0 inicial.
Logo do paso por vestiarios, o conxunto murciano saía coa intención de mover rápido o balón e sorprender con velocidade para chegar pronto á portaría contraria. Pero as herculinas facíanse fortes en defensa e non deixaban entrar con facilidade ás visitantes a disparar á portaría de Leti.
Á súa vez, o conxunto de Jorge Basanta críase forte na pista, e seguía roubando en primeira liña, e xerando contras perigosas, que non se conseguían finalizar.
Os minutos pasaban, e o 0-0 mantíñase no luminoso, cun Viaxes Amarelle FSF que estaba a chegar cada vez con máis perigo. Pero finalmente as visitantes tiraban de calidade e nunha xogada de córner a falta de pouco máis dun minuto. Ángela puña o 0-1 no marcador nunha volea espectacular axustada ao pau.
Aínda quedaba tempo por diante, e as coruñesas non dubidaron en saír co xogo de cinco e buscar igualar a contenda, pero un fallo na defensa a pouco máis de 50 segundos, e sen porteira, facía que Alba Gandía case sen ángulo, puxese un 0-2 no marcador que resultou practicamente definitivo.
A pesar dos dous goles de vantaxe para as visitantes, o Viaxes Amarelle FSF seguíao tentando co xogo de cinco. A falta de 20 segundos para o final, nunha transición rápida de 5 para 4, terminaba coa finalización ao segundo pau de Yaiza.
Unha falta e un segundo para soñar co empate do Amarelle
Quedaba pouco, pero nada imposible, e as herculinas non desistiron en ningún momento. A pouco menos de 4 segundos, roubaron un balón en cancha contraria, e cunha falta a sete metros, a menos dun segundo para o final do partido propiciaba unha oportunidade complicada para as herculinas pero que facía soñar co empate. Martita terminaba por estrelar o balón na barreira murciana. Con iso remataba o partido e os puntos puñan rumbo a Murcia.
Foi, con todo, nun partido moi traballado das galegas. As futbolistas coruñesas mereceron un empate que sería un premio diante dun rival deste nivel que, tras medirse coas galegas, segue invicto nesta tempada.
O Viaxes Amarelle FSF volverá aos adestramentos este luns, tras o preceptivo descanso que tomarán mañá domingo as xogadoras. Xa esperando o próximo fin de semana que toca partido contra un rival directo na Primeira División Nacional Feminina. O o cadro coruñés disputará a sétima xornada do Subgrupo A, o sábado 28 de novembro de 2020 ás 18:00 horas no Pavillón Municipal de Sagrada Familia da Coruña recibindo ao Gran Canaria FSF Teldeportivo que empataba co Cidade de As Burgas.
FICHA TÉCNICA
VIAXES AMARELLE FSF: Leti Rojo, Martita, Yaiza, Lau Doce, Candela Soria – quinteto inicial -. Tamén xogaron: Patri Corral, María Gómez e Cris Lourés.
STV ROLDAN FSF: Almudena, Mariángeles, Lola, Alba Gandía, Noelia Montoro – quinteto inicial -. Tamén xogaron: Ángela, Marta Pelegrín, Cristina García, Marta de los Riscos, Andrea Marín, Cristina e Consuelo.
GOLES: 0-1 Ángela (min. 39); 0-2 Alba Gandía (min. 40); 1-2 Yaiza (min. 40).
ÁRBITROS: Gallo Suárez e Hevia Campa do Colexio de Árbitros de Asturias. Mesa: Verónica Fernández do Colexio de Árbitros de Asturias. Amonestaron con cartón amarelo a Mari Ángeles e Ángela do STV Roldán FSF.
INCIDENCIAS: Partido correspondente á sexta xornada do Subgrupo A da Primeira División Nacional Feminina de Fútbol Sala da RFEF disputado no Pavillón Municipal da Sagrada Familia na Coruña.
