O triunfo colleitado polo Viaxes Amarelle FSF na Sagrada Familia sitúa ás coruñesas máis preto de manterse na elite do futsalfem estatal. Os otres puntos son ouro puro para as futbolistas que adestra Jorge Basanta que remontaron o partido ante o Joventut D’Elx ata vencer por 4-1.
O equipo herculino afrontaba a súa penúltima xornada da tempada en casa, e facíao recibindo a un rival xa descendido, o Clínica Blasco Visitelche Joventut D’Elx. As galegas sabían que as ilicitanas non ían vender baratos os tres puntos, e de feito as visitantes adiantáronse no marcador e conseguiron irse ao descanso cunha vitoria parcial por 0-1.
Pero as futbolsitas do Viaxes Amarelle FSF non cesaron nunca no seu empeño de conseguir a vitoria, e nunha meritoria segunda parte, de loita e decoro, conseguiron dar a volta ao partido e impoñerse por un marcador de 4-1, con goles de Cláudia Lobo, Tety e Estelita, que deixa ás herculinas a un paso de certificar, matematicamente, a permanencia.
O partido empezaba cun Viaxes Amarelle FSF apostado en media cancha, esperando que as visitantes xogasen o balón, e poder buscar de xerar perigo á contra, pero as galegas non conseguían sorprender; e as visitantes cunha defensa moi pechada, facía moi complicado, que as herculinas conseguisen meterse no partido.
Aos cinco minutos de xogo, as visitantes sorprenden, adiantando á súa porteira para mover o balón en xogo de cinco, e nunha destas ocasións, Peque, cun potente disparo exterior cruzado e axustado ao pau, consegue poñer o 0-1 no marcador.
O partido poñíase pronto costa arriba para a escuadra herculina, pero non decaía nas súas opcións de buscar a portería contraria e tratar de conseguir un gol que devolvese a igualada no marcador.
Susto para Carol Agulla que foi trasladada ao hospital
As galegas tentaríao de todas as maneiras, pero o gol non chegaba, e o tempo da primeira metade íase esgotando, e cando xa parecía que todo se ía ao descanso co marcador no 0-1, un balón longo á área, é pelado por Carol Agulla, que recibe un impacto da meta visitante no salto, e cae ao chan.
Quedaba pouco máis dun segundo, que se finiquitaba co 0-1. Pero Carol Agulla tería que ser trasladada a un centro hospitalario, onde tras realizar un TAC, descartábase nada do golpe na cabeza, pero confirmábase unha fractura no nariz, que lle impedirá terminar a tempada sobre a cancha.
Na continuación, a escuadra herculina partía coa baixa de Carol Agulla. As compañeiras seguiron no seu empeño de buscar os tres puntos, e no primeiro minuto de xogo Cláudia Lobo cun potente disparo exterior de 6 metros poñía o 1-1 no marcador.
Aínda quedaba partido por diante, e a escuadra dirixida por Jorge Basanta, buscaba dar a volta ao partido dunha vez por todas; e na medianía do período, Èlia Gullí combina unha gran xogada por banda e finaliza cun disparo exterior, que repele Teresa, e Tety desde dentro da área non perdoa, para subir o 2-1 ao marcador.
As galegas conseguían dar a volta ao partido, e seguían coa presión alta sobre o seu rival, e gozarían doutra ocasión moi clara, tras un roubo de Estelita, en primeira liña, que toca a Cláudia Lobo, pero o balón vaise por alto. E a sete minutos do final, Cris Lourés executa un saque de esquina, onde mete o balón á área e leste impacta en Eli, que termina metendo o balón en propia porta; e subindo o 3-1, a favor das coruñesas no marcador.
As visitantes esgotaban nos últimos minutos as súas ocasións co xogo de cinco, e o Viaxes Amarelle FSF conseguía roubar algún balón e probaba fortuna desde cancha propia, chegando a mandar un balón ao pau da portería ilicitana; e a falta de pouco máis de 50 segundos para o final, Estelita desde cancha propia pon o 4-1, que ao cabo sería definitivo para dar tres puntos de ouro ao conxunto galego, na súa loita pola permanencia.
O Ourense Envialia pode dar a permanencia ao Viaxes Amarelle FSF
Nestes momentos o conxunto herculino, mantén unha renda de 7 puntos sobre o Sala Zaragoza FSF, que mañá disputa o último partido desta xornada 28ª da competición contra o Ourense Envialia FSF; e no caso, de que as galegas se impoñan ás mañas, o conxunto herculino podería certificar a súa permanencia de maneira matemática.
O Viaxes Amarelle FSF tamén mantén unha renda de 4 puntos sobre Rayo Majadahonda Afar4 FSF, que é o equipo que actualmente marca a permanencia, cando só restan 6 puntos por xogarse. Esta vitoria é unha bolsa de osíxeno, que pode valer unha permanencia; pero haberá que seguir pelexando estas dúas xornadas, en caso contrario, para poder certificalo matematicamente, canto antes.
Tras este novo duelo oficial da tempada, o conxunto herculino volverá aos adestramentos o luns, e prepararase en visitar a cancha do actual primeiro clasificado da competición a próxima fin de semana. A Primera RFEF Futsal Femenina afrontará a vixésimo oitava xornada da competición, nun partido que terá lugar o sábado 20 de maio de 2023, a partir das 18:00 horas no Pavillón Municipal da Estación (Navalcarnero), onde o Viaxes Amarelle FSF visitará ao Futsi Atlético Navalcarnero, líder.
FICHA TÉCNICA
4) VIAXES AMARELLE FSF: Leti Rojo, Lau Doce, Èlia Gullí, Tety e Clàudia Lobo – cinco inicial -. Tamén xogaron: Estelita, Carol Agulla, Carlita, María Gómez, Laura Rivas, Cris Lourés e Laura Rivas.
1) CLÍNICA BLASCO VISITELCHE JOVENTUT D`ELX: Teresa, Peque, Eli, Judit e Aitana – cinco inicial -. Tamén xogaron: Bianca, Lydia e Sara.
GOLES: 0-1 Peque (min. 6); 1-1 Clàudia Lobo (min. 21); 2-1 Tety (min. 30); 3-1 Eli (propia puerta) (min. 33); 4-1 Estelita (min. 39).
EQUIPO ARBITRAL: Borja Darriba Villamor e Miguel Jesús Rodríguez Pontanilla do Comité Técnico de Árbitros de Lugo e Pontevedra. Arbitro Asistente: Mayra Araujo Camila del Comité Técnico de Árbitros da Coruña. Mesa: Iván Enríquez Fontenla do Comité Técnico de Árbitros da Coruña. Amonestaron con cartón amarelo a Lau Doce do Viaxes Amarelle FSF. Teresa, Bianca e Peque do Clínica Blasco Visitelche Joventut D’Elx tamén foron sancionadas cun cartón amarelo cada unha.
INCIDENCIAS: Partido correspondiente á vixésimo oitava xornada da Primera RFEF Futsal Femenina disputado no pavillón Municipal de Sagrada Familia (A Coruña).
