O equipo infantil do Viaxes Amarelle FSF, dirixido por Manuel del Castillo, afrontaba deste domingo a final do Campionato de España de clubs de base contra o campión murciano, o LBTL Futsal Alcantarilla. As galegas resultaron vencedoras e campioas.
A pesar de que as herculinas recibiron dous goles en contra nos primeiros minutos de xogo, souberon irse refacendo durante o partido, para conseguir poñer a igualada por 3-3 no marcador antes de chegar ao descanso. Xa na segunda metade, que foi moi igualada, o Viaxes Amarelle FSF conseguía tomar vantaxe no marcador por 3-4. As galegas adestradas por Castillo conseguían aguantar ese resultado ata o asubío final e, dese xeito, ser campioas de España de clubs base en categoría infantil feminina.
O encontro non comezaba da mellor maneira para as herculinas, pois cando apenas pasaran 50 segundos de partido, as locais do LBTL Futsal Alcantarilla adiantábanse cun gol de Clara. Apenas 40 segundos máis tarde, Marta poñía o 2-0 para as murcianas.
O partido parecía que se podía complicar para as galegas, pero estas non se deixaron vir abaixo, e apenas uns segundos máis tarde, Claudia Sande recurtaba distancias no marcador. E aos tres minutos de partido, Alma Reiriz poñía a igualada no marcador, co 2-2.
O partido estaba moi aberto, e Clara conseguía subir o 3-2 ao electrónico, adiantando novamente ao cadro murciano, pero as galegas non baixaban o ritmo, e coa súa calma característica e toque de balón, seguían xerando perigo.
A falta de dous minutos para o tempo de descanso, Sofía Rodríguez conseguía anotar o 3-3 e poñer o marcador en táboas. Con esta nova igualada escuadras retirábanse a vestiarios para descansar antes de afrontar o segundo acto da final.
A segunda parte deste partido presentouse moi igualada. Ningún dos dous equipos quería deixar escapar a oportunidade de alzarse co título de campións de España. Os minutos pasaban e o marcador permanecía inmóbil no 3-3 do primeiro tempo, sen que o gol chegase para ningunha das dúas escuadras.
As galegas non se poñían nerviosas e seguían buscando o gol que lles permitise conseguir o soño. E cando faltaban pouco menos dun minuto e medio para o final do tempo regulamentario, as murcianas cometen un penalti sobre as galegas. Alma Reiriz toma o balón para executar a pena máxima, e sen dubidalo pon o 3-4 no marcador.
Por primeira vez no partido, as galegas adiántanse no marcador, quedaba aínda partido por diante. O Viaxes Amarelle FSF conseguía manter baixo control os ataques das murcianas para defender a vitoria e poder celebrar o título de campioas de España de Clubs Base.
O Viaxes Amarelle FSF agradece a nais e pais a súa “axuda toda a tempada”
Desde o Viaxes Amarelle FSF trasladan os “parabéns a todas as xogadoras e corpo técnico do equipo infantil feminino, por este merecido campionato nacional, onde souberon sufrir tanto en semifinais, como na final, iniciando os partidos con marcadores adversos, e saber xestionalo para finalmente conseguir as vitorias que lle permiten levar a copa de Campioas de España”.
Desde o club, tampouco esquecen “aos pais e nais destas nenas, que a súa predisposición e axuda durante toda a tempada foron vitais para que o equipo chegue a este título; e que ademais ese equipo puidese gozar dunha afección de luxo nas bancadas do Pavillón Municipal Jara Carrillo (Alcantarilla) esta fin de semana. Moitas grazas a todas as mamás e a todos os papás”.
Tras a consecución do título nacional, o equipo infantil aínda ten pendente de disputar unha nova final, neste caso será a final da Copa Galega Infantil Feminina FS, que se disputará hoxe martes 20 de xuño de 2023, a partir das 20:45 horas, no Pavillón Municipal da Raña (Marín). O partido será entre o Viaxes Amarelle FSF e o Milongas ED Poio Pescamar FSF.
