Despois do adiamento da última xornada, o Viaxes Amarelle volve ás pistas para competir ante o líder invicto do grupo pola permanencia. As galegas xogarán contra o Universidad de Alicante a oitava xornada, nun encontro que terá lugar o sábado, 22 de maio, ás 18:00 horas. A cita será no pavillón municipal da Sagrada Familia da Coruña.
O contrincante do equipo dirixido por Jorge Basanta é o único equipo que non coñece a derrota na segunda fase da Primera División, onde alicantinas e galegas compiten no Grupo D. As visitantes chegan cun total de 75 goles a favor e 33 en contra, despois de competir en 23 duelos.
No que vai de tempada o Universidad de Alicante logrou vencer en 14 ocasións e empatou en tres, polo que sufriu unha derrota só seis veces. Desta forma, acumulan 45 puntos e un coeficiente de 1,956. Con seis puntos de vantaxe sobre o segundo clasificado, as universitarias teñen case asegurado o liderado do grupo.
O Amarelle, sexto pero cun partido adiado
Pola súa banda, o Amarelle é o sexto clasificado, cun total de 16 puntos obtidos en catro vitorias e catro empates. As coruñesas están algo descolgadas da zona superior da táboa, ao estar a seis puntos do AE Penya Esplugues, e á vez están máis preto das posicións inferiores, a un trunfo do AD Club Teldeportivo.
Con todo, é importante recordar que as coruñesas aínda teñen un partido pendente por disputar. O encontro programado para a última fin de semana, ante o Sala Zaragoza, tivo que ser adiado. Así, as futbolistas que adestra o técnico Jorge Basanta descansaron desde o xoves pasado ata o martes, cando o equipo voltou aos adestramentos.
Para este sábado, o obxectivo do Viaxes Amarelle pasa por recuperar as boas sensacións e retomar a boa senda tras perder ante o Rayo Majadahonda por un axustado 1-2 no inicio da segunda volta.
O primeiro duelo ante as alicantinas
Na primeira volta, as coruñesas caeron tamén derrotadas ante o Universidad de Alicante. Porén, o conxunto galego foi quen de adiantarse no marcador, pero sen ser capaces de afianzar o trunfo. Finalmente, as de Basanta perderon por un 2-1 final.
Para este novo enfrontamento, o adestrador terá a todo o plantel á súa disposición con algunha excepción: Martita segue lesionada e está en proceso de recuperación da operación do ligamento cruzado anterior, Cris Lourés mancouse na concentración da Selección Española sub21 e Candela Soria está entre algodóns, xa que tivo que abandoar a sesión de traballo do xoves, e está pendente da avaliación dunha posible escordadura de nocello.
Retransmisión vía streaming
Os límites de aforo impiden que o pavillón coruñés da Sagrada Familia se chee ao completo, polo que para que o fútbol sala chegue a toda a afección do Viaxes Amarelle, o club retransmitirá vía streaming o encontro, na súa propia canle de Youtube.
