Novo ano, mesmo podio na Primera Nacional. O fútbol galego segue dominando o grupo 1 da categoría de bronce do fútbol español, co Viajes Interrías no máis alto da táboa.
En segunda posición marcha o PM Friol, quen mantén a prata malia non gañar desde novembro. O bronce, polo de agora, é para o Sárdoma, quen caeu derrotado pero está a dous puntos das lucenses.
A clasificación dos clubs galegos continúa co Dépor ABANCA B en quinta posición, o Umia CF como sexto clasificado, o Victoria CF sétimo, a UD Mos undécima, e o Victoria FC e o SD Villestro pechando a clasificación nos postos de descenso.
Primeira vitoria do 2022 para o Viajes Interrías, vencendo ao filial branquiazul
O conxunto dirixido por Treviño continúa no 2022 co bo traballo e dinámica do 2021, iniciando o ano cunha vitoria ante o Dépor ABANCA B.
O Interrías visitaba Abegondo cun plan de partido que pasaba polo control férreo do balón. As visitantes fixéronse co dominio do xogo desde os primeiros minutos, aínda que tería que achegarse o ecuador de partido para que as de Portonovo abriran a lata.
No minuto 39 Andrea Villadeamigo anotou o primeiro gol da tarde, afianzando a vitoria visitante.
Na segunda parte, as de Treviño seguiron sendo superiores ante as herculinas, destacando especialmente nas tarefas defensivas. O segundo gol non se faría agardar tanto como o primeiro, e no minuto 61 Nati asinaría o 0-2 tras unha xogada por banda.
No tramo final de partido, o equipo de Kevin Cabado loitou por facer dano ás visitantes, sen éxito. As líderes aproveitaron a súa oportunidade para aumentar a distancia co resto de equipos da categoría. Ademais, nos últimos minutos a nova xogadora do Interrías, Alba Jiménez, puido debutar.
Luis Treviño: “Non podes vivir nin da casa nin do que consigas fóra”
O Friol raña un punto ante o Gijón FF
En Friol, as de Covi Regueiro recibían para estrear o ano ás asturianas do Gijón FF, equipo da parte inferior da táboa pero que soubo estar ao nivel das galegas.
O encontro desenvolveuse como un pulso tenso entre ambos conxuntos, que mantivo a igualdade durante toda a primeira parte, deixando o resultado aberto na segunda.
Pouco despois da reanudación, as asturianas golpearon primeiro, cun gol obra de Irene Martínez. As do Friol recompuxéronse para rascar un punto no tramo final.
No minuto 89, Oliva Leon foi quen de anotar o primeiro gol das galegas, que poñía o 1-1 no marcador, co que remataría o partido. Con este resultado, as lucenses son aínda segundas, pero suman outra semana sen gañar desde o 2-3 ao Sárdoma na undécima xornada.
Covi Regueiro (PM Friol): “A Primera Nacional sorprendeunos”
O Victoria FC gaña o seu segundo partido da tempada ante o Sárdoma CF
A sorpresa da xornada estivo no partido que enfrontaba ao terceiro clasificado, o Sárdoma CF, co antepenúltimo, o Victoria FC. As compostelás capaces de facerse co duelo, sumando así a súa segunda vitoria da tempada e manténdose na loita por saír do descenso.
O Sárdoma estreaba o ano en casa, xogando como local malia que a súa especialidade está nos partidos lonxe das Relfas. Unha vez máis, xogar como local pasoulle factura ás de David Ferreiro, que viron como os tres puntos se escapaban na primeira parte.
O único gol do encontro chegaría no minuto 44, pero xa desde o comezo as vermellas mostraron a súa intensidade, mantendo a raia ás locais.
Con varios tiros desde a frontal da área, as santiaguesas xeraban perigo na porta do Sárdoma, que porén non eran capaz de chegar á meta contraria. O gol do Victoria chegaría tras un pase de Laurita a Ana López, quen non fallou cun tiro lexano, colándose pola esquina da portería viguesa.
Na segunda parte, as de Ferreiro loitaron por coller o mando do encontro, pero a presión das visitantes bastou para manter a raia ás locais. O Victoria gozou de máis ocasións que non chegou a materializar, sumando finalmente os tres puntos á fin do duelo.
David Ferreiro (Sárdoma CF): “É importante gañar cando estás ben e tamén cando non”
Vitoria para o UD Mos ante o Victoria CF
O último encontro para as galegas, xa que o duelo entre o Villestro e o Umia tivo que ser adiado, foi o que enfrontou ao UD Mos ante as cebras do Victoria CF.
Neste encontro directo, entre dous equipos da zona morna da táboa, ambos conxuntos deron mostra dunha igualdade máxima na primeira metade.
O partido non se rompeu ata a segunda parte, cando as locais do UD Mos aproveitaron as súas oportunidades. Uns minutos despois da reanudación, no minuto 50, Lucía colleu o esférico tras unha perda das coruñesas para batir a Álvaro e anotar o primeiro gol.
O Victoria intentou reaccionar, pero as locais foron superiores marcando o segundo tanto no minuto 78, desta vez obra de Miriam. Con este 2-0 final, o Mos volve ao camiño da vitoria, despois de estar sen gañar desde o 1-2 ao Villestro do 31 de outubro.
