A Primeira Nacional Feminina de Fútbol Grupo 1A, que conforman os conxuntos galegos, ten nesta segunda xornada un cruce destacado. O Campo Novo San Pedro acollerá o enfrontamento entre o Viajes Interrías FF e o RC Deportivo B ABANCA. O duelo futbolístico dará comezo ás 17:00 horas de mañá sábado 24 de outubro.
A tal hora, e segundo informaron desde o club local, o partido xa ten todas as súas entradas vendidas.
Non hai que esquecer que houbo que, como noutros casos, houbo que reducir o aforo do recinto deportivo por mor das novas restricións marcadas polo goberno autonómico galego para previr o contaxio da COVID-19. A evolución da pandemia na nosa comunidade así o aconsella, segundo determinaron esta semana as autoridades sanitarias.
Para que ninguén quede sen ver o partido entre as de Portonovo que adestra Luis Treviño, e as coruñesas que dirixe Kevin Cabado, o conxunto pontevedrés anunciou que emitirá o partido a través da súa canle de YouTube. Deixámosvos aquí a ligazón para que poidades acceder a velo.
Locais e visitantes gañaron os seus choques anteriores empezando a tempada 2020-21 con vitorias. Na primeira xornada o Viajes Interrías impúxose ao Atlético Arousana na Lomba por 0-3 a domicilio.
Pola súa parte, o Dépor ABANCA B goleou ao Umia CF cun marcador de 9-0. As goleadores por parte branquiazul foron: Aroa (4 goles), Eva Dios (2 goles), María Calvo (2 goles) e Navia.
Noutros cruces entre conxuntos galegos na xornada de arranque o Victoria FC compostelá vencía ao CD Valladares na súa casa por 1-5. E o Victoria CF coruñés, gañaba ao Sardoma CF pola mínima 1-2. Neste grupo impar, tocoulle descansar á UD Mos.
Tal e como destacan desde o Umia CD, o campo de A Bouza volve acoller fútbol “239 días despois”. Ao tepe da cancha de Ribadumia saltarán as ‘Vikingas‘ e o seu rival será o Sárdoma CF. O choque pechará a xornada neste grupo e disputarase ás 17:00 horas do domingo 25 de outubro.
Neste caso o aforo máximo son 150 persoas, tal e como estipula a normativa de prevención para evitar o contaxio do coronavirus COVID – 19. No club explican que darán preferencia na entrada ás persoas socias até as 16:30 h. A partir dese momento “estarán abertas as instalacións para o público en xeral, pagando a correspondente entrada ( 5 euros, para todas as idades, xa que os nenos teñen que ocupar obrigatoriamente un asento)”.
Con respecto ao protocolo de acceso, explican desde o Umia que se vai tomar “a temperatura na entrada, non permitindo o ingreso na instalación se se supera os 37,5 ºC. É obrigatorio o uso de mascarilla e a hixiene das mans. A entrada ó campo farase pola rúa Condesa/García Álvarez e a saída pola Rúa Valle Inclán, respectando sempre os camiños sinalizados con frechas de cores distintas”.
Así é unha xornada na que o Interrías recibe ao líder, o Dépor ABANCA B
Nesta segunda xornada os partidos deste grupo de galegas serán:
- Viajes Interrías FF – RC Deportivo ABANCA B SÁBADO 24 17:00 h Novo San Pedro (Portonovo)
- Victoria FC – Atlético Arousana DOMINGO 25 11:00 h Vero Boquete – San Lázaro (Santiago de Compostela)
- UD Mos – CD Valladares DOMINGO 25 12:00 h (porta pechada)
- Umia CD – Sardoma CF DOMINGO 25 17:00 h A Bouza (Ribadumia)
- Descansa: Victoria CF
A clasificación está encabezada polo filial branquiazul que fai valer o golaverage para poñerse á fronte da táboa nesta primeira xornada de competición.
