Rematou a Primeira Nacional Feminina tras 26 xornadas de competición. O Viajes InterRías FF mantivo a segunda praza que lle dá acceso directo á Terceira RFEF, acompañando ao Peluqueria Mixta Friol como campión da Liga. As de Portonovo sufriron durante todo o encontro xa que o Versalles púxose en dúas ocasións por diante co doblete de Marina. As de Avilés partían como o terceiro mellor equipo da segunda parte da tempada con dous puntos máis que as locais antes de comezar o encontro.
O campo de San Pedro presentou unha entrada magnífica con máis de medio millar de seareiros nas gradas, que empuxaron as súas xogadoras ata acadar a remontada. Nati e Raquel foron as goleadoras do equipo local. Mentres, os outros interesados, Oviedo B e Sárdoma, loitaban nos seus respectivos encontros para alcanzar ao Viajes InterRías FF, pero non lograron a vitoria polo que incluso unha derrota das de Sanxenxo non habería cambiado nada. Trátase do terceiro ascenso do club pontevedrés desde que se fundou, hai sete anos.
O Viajes InterRías FF chegou a liderar a liga na primeira parte da tempada na que foi un equipo sólido e moito máis regular. O equipo que adestra Luís Treviño comezou como un dos candidatos ao ascenso final, pero na segunda volta amosou dúbidas no seu xogo e os resultados fixeron perigar o ansiado ascenso. No último tramo do campeonato as xogadoras de Treviño amosaron todo o seu potencial para pechar a segunda praza e o ascenso directo.
Ver esta publicación en Instagram
O Sárdoma non segue os pasos de PM Friol e Viajes InterRías
Así as cousas o Sárdoma quedouse coa terceira posición, pero sen opcións para acceder á Terceira RFEF xa que non está entre os mellores terceiros clasificados dos sete grupos [tan só acceden á nova categoría do fútbol feminino os campións e subcampións de cada un dos sete grupos da Primeira RFEF e os catro equipos con mellor coeficiente de entre os clasificados en terceira posición dos sete grupos].
Rematado o campionato xa se coñecen os equipos que acompañarán ao PM Friol e ao Viajes InterRías Fútbol Femenino na vindeira tempada na Terceira RFEF. Serán: o Club Bizkerre e o Club Filial Fundación Osasuna Femenino “B”, como primeiros clasificados no grupo II; o CE Europa e o Balears FC, no grupo IIIs; Málaga CF e CD Badajoz 1905, no grupo IV; Real Madrid B Fem e Alter Torrelodones CF, no grupo V; Fundación Canaria CDT e Unión Viera CF, no grupo VI; e Valencia Féminas CF “B” e Levante UD “B”, no grupo VII.
Descenso do Villestro e permanencia do Victoria FC
Polo que respecta á parte baixa da táboa houbo emoción ata o asubío final. O Real Sporting De Gijón SAD “B” descendeu tras empatar a domicilio contra o CD Olímpico de León, e acompaña deste xeito ao SD Villestro Femenino na perda de división. As asturianas partían con vantaxe na clasificación na súa loita pola salvación na que tamén se atopaba o Victoria FC, que gañou o seu partido por 3-1 contra o UD Mos. As santiaguesas lograron 13 dos últimos 15 puntos en xogo, un final de tempada que lles serviu para manter a categoría.
Os equipos que continuarán, por tanto, na Primeira División Nacional de Fútbol Feminino xunto ao Victoria FC, Sárdoma e Oviedo Moderno CF B serán: Deportivo Abanca “B”, Umia CF, Versalles, Gijón Fútbol Femenino, CD Olímpico de León, UD Mos e Victoria CF.
Remata así un campionato de liga 2021-22 na Primeira División Nacional do Fútbol Feminino español tras 26 xornadas de paixón e sacrificio. A as xogadoras poden estar satisfeitas do espectáculo ofrecido nesta categoría estatal. Esta tempada, deixará paso a unha reestruturación das ligas femininas anunciada pola Real Federación Española de Fútbol.
