O mal tempo, nomeadamente os fortes refachos de vento que zoan na cidade herculina (60 km/hora), fixeron que a carreira San Silvestre Coruña tivera que ser suspendida. A organización busca unha data na que levar a cabo a proba antes de que remate o tempo de Nadal.
“O Concello da Coruña suspende a San Silvestre Coruña debido ás malas condicións meteorolóxicas. Tentamos manter a carreira ata o último momento pero finalmente non foi posible”, así reza o aviso que a organización da carreira máis divertida do ano publicaba onte á noite nas súas redes sociais para notificar o que moita xente temía que puidera pasar vistas as previsións meteorolóxicas.
Hai que conservar o dorsal da San Silvestre Coruña por se celebra a carreira
Explican tamén desde a organización da carreira popular que están traballando para “tentar pechar unha data para realizar a proba antes de que terminen as vacacións do Nadal. O luns confirmaremos a data. Sentimos os prexuízos pero a seguridade é o primeiro”, advirten desde a San Silvestre Coruña.
🚨🚨AVISO IMPORTANTE🚨🚨 | El Concello de A Coruña SUSPENDE LA #SanSilvestreCoruña debido a las malas condiciones meteorológicas. Hemos intentado mantener la carrera hasta el último momento pero finalmente no ha sido posible.
— sansilvestrecoruna (@silvestrecoruna) December 30, 2022
De cara á celebración da proba noutra data nos vindeiros días, avísase tamén desde as redes sociais da carreira de que é importante que as persoas participantes conserven “o dorsal para participar o día no que se realice”. De feito advertían que hoxe seguiríanse “entregando dorsais en Decathlon“.
Segundo recolle AXEGA 112, a Axencia Estatal de Meteoroloxía (AEMET) informou onte á noite dunha ampliación do episodio adverso de nivel laranxa que afecta o litoral galego. Segundo a previsión, os efectos deste fenómeno, que trae fortes ventos e ondas de ata sete metros, estenderanse a outras zonas da comunidade e deixaranse sentir tamén na provincia de Pontevedra, manténdose na da Coruña. Nesa alerta laranxa por fenómenos meteorolóxicos adversos falábase de ventos de forza ata 8 e mar combinada de ata 6 metros e 7 metros mar adentro.
Recolle a AXEGA 112 que entre as 00:00 horas e as 8:00 horas de hoxe en Galicia rexistráronse 77 incidencias recollidas polo 112 Galicia relacionadas con vento e a choiva. Concretamente na provincia da Coruña contabilizáronse 56 deses 77 incidentes, e deles, seis ocorreron na cidade da Coruña. Os sucesos máis repetidos fron caídas de árbores e ramas nas estradas (34 dos 56 rexistrados na provincia coruñesa responderían a ese perfil).
