O último partido do Valdetires Ferrol FS non chegou con vitoria, pero tampouco foi necesario. As galegas proclámanse campioas da Segunda División no grupo 1C.
Na segunda posición están, a falta dunha xornada, as tamén irmandiñas do ENCE Marín, polo que haberá dobre representación de Galicia no play-off de ascenso á Primeira División do fútbol sala feminino estatal onde xa militan máis conxuntos galegos.
Derrota sen consecuencias para o Valdetires
O equipo ferrolán xa lograra a clasificación para a seguinte fase, e nesta última xornada certificou o título de campión. O duelo disputado contra o Rodiles rematou nun 5-2 a favor das asturianas.
O conxunto local xogábase o posto no play-off polo que deixouno todo na súa pista. Antes do descanso, o marcador xa anunciaba o 2-0 cos goles de Clara e Isa. Na segunda parte o Rodiles aumentou a súa renda, pero o Valdetires aumentaba a presión provocando un gol en propia porta e cun tanto de Lucía. O empate rondou a portería local, pero a vitoria quedaría en terras asturianas cun 5-2 final.
Malia este resultado as ferrolás acumulan un coeficiente de 2.428, o que lles garante a primeira posición. Ademais do título, esta clasificación serve como punto a favor na seguinte fase, tendo o factor campo ao seu favor.
Na fin de semana do 22 de maio, o rival do Valdetires será o UDC Txantrea, actualmente terceiro clasificado.
Que gusto da recibir la felicitación de una jugadora histórica del fútbol sala femenino 😘💚@SeijasCouce por qué no te planteas el descolgar las botas ? 🤗🤗💚💚 https://t.co/YjKFNuQmgB
— valdetiresfsf (@valdetiresfsf) May 10, 2021
Vitoria vital do ENCE Marín
Cun trunfo importantísimo ante un rival directo, o ENCE Marín sube á segunda posición con só unha xornada máis en xogo. As galegas visitaban ao UDC Txantrea, ao que venceron por un 0-3.
O obxectivo estaba claro e as xogadoras galegas cumpriron sobre a pista. O equipo de Marín fixo un partido redondo de principio a fin, dominando en todos os aspectos do xogo. Dous minutos foron suficientes para abrir a lata con gol de Cafe e decantar o partido cara o bando visitante.
Antes do descanso Ceci encargouse de poñer o 0-2 cun disparo desde os nove metros e superar a Goñi na portería local. Na segunda metade, o ENCE Marín xogou a pracer dominando con tranquilidade os tempos. O Txantrea non xeraba perigo e a vitoria galega certificouse cun terceiro gol, desta vez grazas a María León. A pivote non dubidou cun disparo raso para que o balón tocase a rede rival. Desde a defensa, Alicia estivo imbatible baixo paos, mantendo a portería visitante a cero.
Con estes tres puntos, as marinenses superan no coeficiente ás navarras, logrando por unha lixeira vantaxe a segunda posición. As primeiras suman un 2,238, mentres que as segundas están nos 2.217. Para a última xornada deberán refrendar esta clasificación para ter o factor cancha a favor no play off.
O seguinte rival das galegas será o CD Gora, penúltimo clasificado.
Final, Final, Final
Final en el Pabellón Arrosadia de Pamplona
Segunda RFEF FemeninaTxantrea KKE Fútbol Sala femenino – 0
🆚
Ence – Energía & Celulosa Marín Futsal – 3#xuntadegalicia #concellodemarin #enceplansocialpontevedra #deportegalego #non pic.twitter.com/U9KBeMpOB7
— Marin Futsal (@marin_futsal) May 8, 2021
O FSF Castro e o CD Mosteiro Bembrive
No grupo 1C hai outros dous equipos galegos que xogan xa sen opcións ao ascenso. O FSF Castro sumou unha vitoria a domicilio ocntra o Gorga na última xornada cun 2-3, polo que ocupan a sexta posición, cun coeficiente de 1,619.
Pola súa parte, o CD Mosteiro Bembrive tamén acadou un trunfo, gañando ao Promesas EDF por un 2-4. Porén, seguen a ser colistas, cun coeficiente de 1.285.
O camiño á Primeira División
Só queda unha xornada para pechar a segunda fase, pero xa se coñecen os catro equipos que competirán no play-off: os dous galegos, o Valdetires e o ENCE Marín, e o UDC Txantrea e o Rodiles.
Despois do último encontro programado disputaranse as semifinais do grupo na loita polo ascenso a partido único no campo do mellor clasificado. As semifinais, previstas para a fin de semana do 29 e 30 de maio, enfrontarán ao primeiro co cuarto e ao segundo co terceiro. A final será entre o 5 e o 6 de xuño.
O vencedor desta final aínda non teñen o ascenso asegurado. Os gañadores de cada grupo rodearanse segundo o coeficiente das dúas primeiras fases da competición. Así, o mellor e o peor coeficiente disputarán unha semifinal e os outros dous equipos outra.
Os gañadores destas semifinais serán quenes finalmente obteñan a praza directa na Primeira División. Os perdedores enfrontaranse en eliminatorias de promoción aos clasificados no 13º e 14º posto da máxima categoría para as outras prazas na categoría de ouro.
