Unha traca final de goles adxudicou o primeiro dos partidos do Play-Off de ascenso á Primeira División do Fútbol Sala Feminino español ao Valdetires FSF.
Co partido empatado 1-1, nos dous últimos minutos de partido as futbolistas de Ferrol conseguiron anotar 2 goles a O Fisgón FSF que deixaron a eliminatoria 1-3.
O partido final, que se disputará o vindeiro sábado 25, será entre dous conxuntos coruñeses, dado que o Viaxes Amarelle FSF xa estaba clasificado.
O primeiro dos partidos do play-off de ascenso á Primeira División, xogado entre O Fisgón FSF e Valdetires FSF foi moi disputado e contou con alternancias no dominio do xogo para ambos clubs.
O partido xogouse a porta pechada, sen público nas bancadas, como medida de prevención diante do contaxio do virus COVID19. Precisamente en memoria das vítimas da COVID gardouse un minuto de silencio antes do inicio do encontro.
Didi marcou o primeiro gol do Valdetires
Tanto as pontevedresas como as ferrolás tiveron ocasión de anotar pero o balón resistíase a entrar. Finalmente, abriron o marcador as de Ferrol por medio de Didi (0-1). Minutos despois Vera mandaba un balón ao traveseiro. Este ir e vir de ocasións é unha mostra do que foi o partido, un auténtico toma e daca dunhas e outra, con momentos de control e ocasións claras de gol para os dous clubs.
En definitiva, o pavillón de Elviña na Coruña acolleu un partido cun fútbol sala de alto nivel que puido seguir a afección de ambos o dous conxuntos a través do streaming que habilitou a Real Federación Galega de Fútbol.
As porteiras de ambos os dous conxuntos foron das xogadoras máis destacadas do cruce, aguantando unha contra unha, e disparos de rechaces.
Café foi a artífice do gol do equipo pontevedrés que acadaba así empatar o choque pasados os cinco primeiros minutos da segunda metade.
Cando xa se contaba con ir á prórroga, nos últimos dous minutos de partido o Valdetires FSF foi quen de anotar dous goles e sentenciar o partido cun 1-3 ao seu favor. O primeiro asinábao Lidia Mesías e o segundo Peli aproveitando un roubo de balón e que O Fisgón se lanzara a por todas con xogo de porteira – xogadora deixando a súa meta exposta.
Truncábase así o soño das xogadoras que adestra Pili Costa que eran as únicas dos tres bloques aspirantes ao ascenso que aínda non teñen militado en Primeira. O conxunto de Marín, felicitaba ao seu rival na súa conta de Twitter.
🕠Final. ⚽ @ofisgonfutsal 1 – 3 @valdetiresfsf. Enhorabuena a nuestras rivales. Ahora ellas a disfrutar de la final del #playoff y nosotras a seguir haciéndonos grandes. #futsalfem #futsal #acfsf #competirmola #serpiratamola
— @ofisgonfutsal (@ofisgonfutsal) July 18, 2020
Comeza a segunda parte do reto para o Valdetires que terá que dalo todo outra vez, unha semana despois e no mesmo escenario (Elviña-A Coruña). Ese resultado coloca ás futbolistas de Ferrolterra como as rivais do Viaxes Amarelle no partido definitivo que decidirá que conxunto galego ascende á elite estatal.
FICHA TÉCNICA
O FISGÓN FSF: Andrea, Suki, Paula, Eri, Didi, Lidia, Ainhoa, Peli
Adestradora: Pili Costa.
VALDETIRES FSF: Ana, Pau, Kun, María León, Café, Charo, Vera, Mar, Marta, Jessi, Karen, María D., Antía (p.s.), Marina (p.s.).
Adestrador: Daniel Pardo.
GOLES: 0-1 Didi (13′); 1-1 Café (33′); 1-2 Lidia (40′); 1-2 Peli (40′)
COLEXIADOS: Árbitro principal: Manuel Dans Rey (A Coruña). 2º árbitro: Borja Darriba Villamor (Lugo). 3ª árbitro: Laura Vila Rivera. Cronometrador: Boraja Moreira Vermúdez. Viron tarxeta amarella Café e Vera.
INCIDENCIAS: Pavillón de Elviña (A Coruña). Partido correspondente ás semifinais do play-off de ascenso da Segunda División á Primeira División Feminina do Fútbol Sala. O encontro disputouse a porta pechada por mor do protocolo de prevención diante do coronavirus COVID-19. Antes do partido gardouse un respectuoso minuto de silencio en lembranza, precisamente, das vítimas da COVID.
