O Valdetires Ferrol FSF ten xa un posto asegurado no play-off polo ascenso á Primeira División de futsal. As galegas venceron na última xornada ao Viuda de Sainz Gora de Bilbao cun 3-4 e mantense como líder do subgrupo 1C, con 48 puntos e un coeficiente do 2,52.
Con esta clasificación, as ferrolás logran o primeiro obxectivo da presente campaña, a falta de tres xornadas para que finalice a segunda fase competitiva. O Valdetires está un paso máis preto de volver á máxima categoría cinco anos despois do seu descenso.
Antes de disputar a semifinal do play-off de ascenso, as galegas propóñense ser campioas do seu subgrupo, polo que deberán seguir sumando vitorias nos seguintes encontros: Promesas EDF Camping de Bañares, Rodiles FSF e UDC Txantrea KKE.
O ENCE Marín podería acompañar ao Valdetires no play-off
Do subgrupo 1C, os catro primeiros clasificados serán os equipos que pasarán a disputar o play-off. Actualmente, outro conxunto galego con opcións de facelo é o ENCE Marín Futsal, que ocupa xusto a última praza de promoción.
Con 41 puntos, pero 19 partidos disputados, as galegas son cuartas e empatan co Promesas EDF, que porén competiu en máis ocasións. Así, o seu pase ao play off pende aínda dun fío.
Atendendo á clasificación actual, o FSF Castro e o CD Mosteiro Bembrive non teñen opcións de competir polo ascenso, xa que as primeiras ocupan a sexta posición, con 30 puntos, e as segundas son colistas, con 23.