Que o HC Borbolla perdese diante do Telecable Gijón entraba dentro da lóxica e así sucedeu. As asturianas fixeron valer a superioridade teórica do seu xogo. Imprimiron intensidade ao partido nos primeiros 25 minutos e resolveron o marcador na recta final da primeira parte. No resto do cruce, o encontro foi máis igualado do que pode reflectir o marcador de 2-6 co que remataba o cruce en Monte Alto.
“O partido comezou cun ritmo moi alto por parte do Telecable“, explica Santi Martínez, adestrador das galegas. Esa circunstancia “obligounos a nos multiplicar en defensa con constantes axudas”, relata o adestrador. Foi nese momento do choque no que as asturianas anotaría o 0-1 que inauguraba o luminoso na cancha coruñesa. O tanto chegou cando se levaban consumidos tan só tres minutos de partido e foi obra de Natasha Lee.
Un minuto despois, Fernanda Muñoz devolvía as táboas ao marcador anotando unha falta directa froito dun cartón azul á patinadora coruñesa (nas filas do Telecable), María Sanjurjo. Segundo relata Santi Martínez, pese ao gol visitante, as galegas seguiron “xogando tamén con moita intensidade. Foi iso o que nos levou a empatar grazas a un libre directo que transformou Fernanda Muñoz“.
Non baixaron os brazos no Telecable e esa intensidade levoulles a conseguir o segundo tanto e volverse pór por diante no partido. Foi no minuto sete cando a internacional española Marta Piquero asinaba o 1-2 para as de Gijón.
O adestrador das coruñesas relata que o Gijón seguiu imprimindo ao partido “un forte ritmo. O encontro avanzaba cun domino delas e nós defendendo con moita intensidade. Puxemos en apuros en varias ocasións á meta rival con rápidas contras. Incluso, nese tramo do partido, Fernanda Tapia detívolle un libre directo a Tasha Lee”.
Avalancha de goles do Telecable Gijón
Así avanzaba o choque até que chegou a avancha anotadora do Telecable que nos minutos finais da primeira parte resolveu o partido anotando catro goles. “Aproveitaron un par de desajustes nosos para distanciarse no marcador até o 1-6”, explica Santi Martínez.
Os goles chegaron a través de Marta Piquero (que acadaba así o seu segundo gol da xornada), Vanessa Daribo, Sara Roces e Natasha Lee (que tamén sumou dous tantos).
“Na segunda metade o partido equibrouse máis. Tivemos máis posesión e as ocasións estiveron máis repartidas”, conta o técnico das locais sobre o encontro. O marcador non reflectiu cambios até que, a dous minutos do final, “Lucía lograba o noso segundo gol tras unha asistencia de Fernanda Muñoz”, narraba Santi Martínez.
Nas vindeiras semanas preséntanselle ao HC Borbolla retos interesantes de cara á loita pola permanencia na Ok Liga. As galegas teñen por diante na seguinte xornada a visita ao Garatge Plana Girona CH que está dous postos por encima na táboa pero so a tres puntos de distancia. O seguinte equipo que se achegará a Monte Alto será o CP Las Rozas. Ese partido porá fin, na fin de semana do 23 de xaneiro, á esta primeira fase da competición na máxima categoría do hoquei a patíns feminino estatal.
FICHA TÉCNICA
HC BORBOLLA: Fernanda Tapia, Bea Pereira, Lara Yáñez, Fernanda Muñoz e Lucía Yáñez – quinteto inicial – Tamén xogaron: Julia Cabanas, Antía Rivadas y Marta Vilas.
TELECABLE GIJÓN: Eva Mejido Álvarez, Natasha Lee Suárez, Sara González Lolo , Marta González Piquero e María Sanjurjo – quinteto inicial – Tamén xogaron: Sara Roces Vila, Vanessa Daribo e Nuria Obeso Almeida.
GOLES: 0-1 min. 3: Natasha Lee. 1-1 min. 4 Fernanda Muñoz (falta directa). 1-2 min. 7 Marta Piquero. 1-3 min. 14 Marta Piquero. 1-4 min. 17 Vanessa Daribo. 1-5 min. 21 Sara Roces. 1-6 min. 22 Natasha Lee. 2-6 min. 48 Lucía Yáñez.
ÁRBITRO: Íñigo López Leitón Zapico. Amosou cartón azul a María Sanjurjo (en dúas ocasións) polas visitantes e a Bea Pereira polas locais.
INCIDENCIAS: Partido correspondente á duodécima xornada da Ok Liga Feminina disputado no Pavillón de Monte Alto na Coruña.
