O taekwondo galego volta con 8 medallas do Campionato de Combate

A Selección Galega de taekwondo competiu no Campionato de España de Combate con gran éxtio. As galegas voltaron a casa con oito medallas: dous ouros, dúas pratas e catro bronces.

O torneo, disputado en Benidorm, deixou ao equipo da Federación Galega de Taekwondo como subcampión a nivel estatal. En total participaron oito taekwondistas co conxunto irmandiño.

Os ouros do taekwondo galego

Arlet Ortiz, do Mat’s, competiu nos -57kg e logrou a medalla de ouro tras vencer en catro combates. Comenzou ante Anastasia Ignatyev, superando á valenciana en todo momento e vencendo por un resultado final de 7-2. Nos cuartos agardaba a andaluza Nabila Djeda, á que Ortiz foi claramente superior, impoñéndose por un 23-3.

Na semifinal a rival foi Elena Torres, e a galega foi quen de vencer por un 26-14. Finalmente, María Vera, das Baleares, foi a contrincante na final do campionato, á que Arlet Ortiz venceu proclamándose campioa do seu peso.

Equipo galego no Campionato de España de Combate feminino / FG Taekwondo — Arlet Ortiz no Campionato de España de Combate feminino / FG Taekwondo

Tamén foi ouro Tania Castiñeira, do Hebe. A deportista acudiu ao Campionato de España de Combate en busca de defender o seu título de campioa e así o fixo. O primeiro combate no que participou enfrontouna a Zuriñe Padilla, vencendo con facilidade cun 3-23.

Nas semifinais agardaba a madrileña Miriam Ortega, á que Castiñeira superou nun combate controlado que rematou no 2-14. Xa na final, a galega tivo que loitar de novo contra Belén Morán, rival do ano pasado. As dúas taekwondistas, que ademais adestran xuntas no CAR de Barcelona, deron un espectáculo cun combate moi igualado.

O primeiro asalto foi para Morán, cun 0-4, mentres que para o segundo, a galega Tania Castiñeira remontaba impresionantemente poñéndose por diante cun 9-5. No terceiro asalto, Belén apurou as cousas e chegou a empatar. Nos últimos segundos Castiñeira proclamouse campioa nunha gran acción (12-9).

Dúas pratas para a Federación Galega

Alma Pérez, do Suh Sport, participou no peso de -53 kg e realizou un gran torneo, finalizando na segunda posición. Na primeira rolda superou a Beatriz Núñez sendo claramente superior (22-2). Na seguinte fase alzouse coa vitoria ante a valenciana Paula Termina, cun 14-5.

Xa na semifinal, Alma enfrontouse á madrileña Nerea Fernández, á que venceu cun 39-8. O camiño ao ouro complicouse na final. O último combate foi ante Laura Rodríguez, nunha loita tremendamente axustada e emocionante ata o final. O ouro decidiuse por un solitario punto a favor da castelá, aínda que Alma Pérez foi por diante en gran parte do combate.

A outra prata foi obtida por Sara Cortegoso, do Mace Sport, na categoría de -46 kg. Nos cuartos de final, a galega impúxose ante a madrileña Laura García e superou nun rifado combate á catalá Gloria Ruíz. Cortegoso chegou ata a final, onde foi derrotada por Ana Jiménez, polo que rematou por proclamarse subcampioa do Campionato de España de Combate.

Os catro bronces galegos

A galega Desiree Rivadulla, do Suh Sport, competiu no mesmo peso que Castiñeira, sendo eliminada na semifinal por Belén Morán, subcampioa. A galega triunfou primeiro ante Clara Gea, cun 5-23, pero nada puido facer nas portas á final, cando a madrileña se impuxo por un só punto (8-7).

Na categoría de -49 kg competiu María Ferreiro, quen tamén rematou na terceira posición. A taekwondista galega venceu nos cuartos de final á madrileña Sandra García por un 22-8, pero foi derrotada por Adriana Cerezo, finalmente campioa de España.

Ainoha García, do Couto, tamén se colgou n bronce nos -67kg. A galega superou á vasca Laura Paz e á catalá Ana Martos. Nas semifinais a andaluza Irene Montero foi superior, malia competir nun axustado combate.

A última medalla chegou da man de Myriam García, do Patiño Moaña, quen competiu nos -62 kg. Esta deportista venceu a Irati Irigoyen e a Mar Machi con claridade, ata chegar ás semifinais. Alí a veterana Jone Magdaleno foi mellor taekwondista, vencendo á galega para despois levarse o título de campioa.