O taekwondo galego está a triunfar en Sofía, onde se disputan os Multi European Games. Polo de agora, en categoría cadete, o grupo irmandiño sumou tres medallas: un ouro de Noa Romero e dous bronces, de Ada Hermelo e Nadia Bouzas.
Na primeira xornada, Ada Hermelo (-33, Hebe) e Nadia Bouzas (-37, Kae Sport) acadaron ambas a terceira posición nesta competición e quedaron moi preto de conseguir a clasificación para o Europeo desta categoría (os dous primeiros clasificados terán un posto no Europeo).
A primeira delas comezou a competición contra a deportista local Elina Krumova, e a galega deixou de lado os nervios e venceu por 15-6. Así garantía unha medalla, pero Ada quería seguir avanzando e na semifinal esperaba a ucraína Anastasiia Volosenko. Foi un gran combate, moi disputado, no que Ada loitou ata o final, pero non puido superar a Volosenko (27-23).
Pola súa parte, a taekwondista do Kae Sport, tamén logrou subir ao podio. Na primeira rolda foi tremendamente superior á suíza Leona Morina para avanzar cara aos cuartos de final, onde esperaba a alemá Johanna Rommel. Foi un combate duro e moi axustado que tivo que decidirse no punto de ouro, onde a galega foi máis efectiva para lograr a vitoria e, a vez, garantir a medalla de bronce.
Na semifinal tivo como rival a Hayrunisa Gurbuz (Turquía) e a nosa Nadia, pese a súa magnífica actitude e valentía, nun puido parala na súa traxectoria impecable cara ao ouro. Magnífica medalla de bronce para Nadia.
O ouro chegou da man de Noa Romero
Na segunda xornada do Europeo de taekwondo, os resultados galegos non fixeron máis que mellorar. Era o turno de Noa Romero (-44, Natural Sport), e a deportista logrou chegar ao máis alto do podio, proclamándose campioa na súa categoría.
E non foi unha competición sinxela para a nosa deportista, que se enfrontou a catro grandes taekwondistas. En primeira rolda enfrontouse á turca Sila Irmak Uzuncavdar e a deportista do Natural venceu por 10-5. E este foi o combate máis axustado de todos. Nos cuartos superou con moita facilidade á serbia Irina Gavrilović (31-11) e garantiu así a medalla de bronce.
Pero Noa quería o premio gordo no continental de taekwondo e foi a por el. Na semifinal atopouse con outra turca, Serya Naz Ozdemir e novamente, a nosa taekwondista non deu a máis mínima opción e logrou o pase á final (7-27). E xa na final, loitou contra de Melisa Eravcı (Turquía) cun marcador un pouquiño máis igualado, aínda que a galega controlou sempre o combate (14-20).
A competición no Multi European Games de taekwondo continúa a fin de semana
O sábado será o turno dos taekwondistas júnior, con María Ferreiro (-49, Couto), Yadira Reimúndez (-55, Mat’s), Irene Montemuíño (-63, Natural Sport), Cloe Iglesias (-63, Patiño), Ainoha García (-68, Couto) e Nuria Cernadas (+68, Natural Sport).
A competición finaliza o domingo coas sénior, coa participación de Sara Cortegoso (-46, Mace Sport), Alma Pérez (-53, Suh Sport), Arlet Ortiz (-57, Mat’s) e Tania Castiñeira (+73, Hebe).
