O SPAR Girona pasoulle por riba a un loitador Durán Maquinaria Ensino, que comezou confiado o partido pero perdeu o control no segundo cuarto (74-89).
As de Carlos Cantero tiñan por diante o difícil reto de recibir ás segundas clasificadas da Liga Feminina Endesa, un equipo que viña de sete vitorias consecutivas e sumou a oitava a costa das galegas.
As lucenses, malia tratar de ti a ti durante a maior parte do partido ás catalás, non foron capaces de completar a fazaña da remontada na segunda parte do encontro. Á fin deste duelo, as locais ocupan a sexta posición con 35 puntos.
O Ensino tivo ao Girona contra as cordas no primeiro cuarto
Nas primeiras xogadas que se podían ver no Pazo dos Deportes de Lugo, o protagonista eran sen lugar a dúbidas o Ensino. As locais, entre as que destacaba a recentemente integrada Helena Oma, achegábanse con facilidade ao aro, superando con facilidade ás interiores visitantes.
Os puntos crecían no casilleiro do Ensino grazas á actuación de Hempe e Stanacev, mentres que as catalás respondían con acerto desde a liña de tres. Pero no bando galego sobresaía Vega Gimeno, autora de nove puntos en dez minutos, o que permitiu que as locais remataran o cuarto cun 21-18 a favor.
O partido presentábase adquirible para un conxunto galego que lle plantaba cara a un dos rivais máis fortes da competición e xa clasificado para a final da Euroliga Feminina. Porén, o propio SPAR Girona deu mostra de por qué é un dos mellores cadros da xeografía española no segundo cuarto.
Pasados os primeiros dez minutos de partido as catalás reaccionaron. Subindo a marcha en ataque e en defensa, as de Julbe Bosch remontaron encestando a pracer no segundo parcial.
Nos primeiros compases, Bea Sánchez e Stanacev mantiñan ás locais por diante cnu 27-23, pero pouco durou a alegría. Mentres que Gimeno e Stanacev esforzábanse por manter ao Ensino no xogo, Vasic e Eldebrink no bando rival sumaban sen parar mentres que as súas compañeiras Ferrari e Gray marcaban desde a liña de tres.
O nerviosismo apoderouse das galegas, que comezarona cometer moitas perdas de balón e outros erros que lle poñían en bandexa a remontada ás visitantes.
A brecha entre ambos equipos era cada vez maior, chegando a unha diferenza de catorce puntos que o bo facer do conxunto de Cantero non era capaz de baixar. Así chegou o descanso, cando o marcador informaba do 38-52.
A remontada non foi posible
Para a segunda parte, dous triples de Aliaga marcaban o camiño para a remontada e recuperaban a ilusión para as de casa.
Porén, o SPAR Girona encargouse cedo de rebentar esa burbulla de esperanza. O acerto das súas exteriores e a efectividade de Chelsea Gray na dirección do xogo e baixo aro, mantiñan ás catalás por diante.
Un bo parcial do Ensino colocou ás lucenses a catro puntos das rivais no último minuto do terceiro cuarto, pero as catalás impediron calquer atisbo de remontada afianzando a súa vantaxe cun 57-75 para encarar o último tempo.
Todo apuntaba xa á contundente vitoria visitante, pero o último que fixeron as lucenses foi baixar os brazos. O Ensino apretaba confiando aínda nas súas posibilidades de alcanzar ás contrincantes, e foi capaz de colocarse a menos de dez puntos.
A actitude do equipo de Cantero puxo en apuros ao SPAR Girona, que tivo que manter a concentración ata o último minuto para levarse a vitoria. A pesar das canastras de Aliaga, as catalás poñíanse de novo a once puntos de diferenza cando restaban catro minutos para o final.
O Ensino rozou coas puntas dos dedos, senón a vitoria, polo menos o empate ante un xigante da talla do Girona. Con todo, o orgullo e tesón das lucenses non foi suficiente e o partido rematou cun 74-89 no marcador.
Reencontro de Helena Oma co seu ex equipo
A última incorporación do Ensino, a catalá Helena Oma tivo a oportunidade nesta xornada de reencontrarse co seu ex equipo. Neste partido, a alero formou parte do quintento titular e foi autora de catro puntos e catro rebotes nos 31 minutos nos que estivo en pista.
Oma formou parte do Girona nas últimas cinco tempadas, pero recalou no conxunto galego hai unhas tres semanas para reforzar o seu perímetro.
Ver esta publicación en Instagram
FICHA TÉCNICA
74) DURÁN MAQUINARIA ENSINO: Hempe (13), Stanacev (4), Gimeno (20), Aliaga (13), Oma (4) —quinteto inicial—. Tamén xogaron: White (14), Prieto (2) e Bea Sánchez (4).
89) SPAR GIRONA: Laia Palau (4), Vasic (12), Eldebrink (18), Araujo (6), Reisingerova (6) —quinteto inicial—. Tamén xogaron: Elonu (6), Labuckiene (3), Gray (16), Soler (7) e Ferrari (11).
PARCIAIS: 21-18, 17-34, 19-23 e 17-14.
ÁRBITROS: Guillermo Rios, José Javier Marqueta e Rodrigo Garvin.
INCIDENCIAS: Partido correspondente á xornada 25 da Liga Femenina Endesa disputado no Pazo dos Deportes de Lugo a porta pechada.
