O club coruñés do CRAT Residencia Rialta é o maior representante galego a nivel estatal, pero quere seguir medrando, achegando o rugby a todas as persoas, e coa meta de crear un equipo inclusivo. Nesta liña, o conxunto, en colaboración coa Fundación Emalcsa, está a desenvolver actividades formativas cada sábado, de balde, e abertas a todo o público.
Esta iniciativa seguirá en marcha ata finais de xullo, e Juan Carlos Navarro ‘Cala’ é o seu coordinador. “A idea é intentar que o deporte, e en concreto o rugby, chegue a todos”, explica.
Este veterán do deporte oval encárgase agora da faceta de rugby inclusivo dentro do CRAT. Con anos de experiencia, Cala asegura que “no noso deporte sempre tivemos moita diversidade. Hai os que corren máis, os que corren menos, os que teñen máis forza e os que teñen menos, os máis hábiles e os menos hábiles. E todos teñen unha labor que facer dentro do equipo”.
O atractivo do rugby para todos os públicos
Con todo, de portas para fóra, o rugby ten barreiras que desde o CRAT buscan derribar. Segundo apunta o preprarador, “o problema do rugby é que a xente pensa que é un deporte moi bruto. Evidentemente, é un deporte de contacto, pero que inicialmente pódese ir graduando ese contacto”.
Cala (Coordinador de rugby inclusivo no CRAT): “Os valores do rugby son o compromiso, compañerismo, que todo o mundo vale e todo o mundo é necesario”
Como contrapunto positivo, Cala recalca os valores que son xa característicos do deporte oval: “Os valores do rugby son o compromiso, compañerismo, que todo o mundo vale e todo o mundo é necesario para xogar, tanto xogadores como árbitros, o respecto aos demais”, apunta, facendo especial fincapé no respecto e o compañeirismo.
Na pasada fin de semana, o club herculino comezou unha serie de actividades que se seguirán desenvolvendo cada sábado ata finais de xullo en Acea da Ama. As portas están abertas a todo o público, e as sesións, de balde, son de 10:30 a 12:30 horas.
Cala: “Todo o mundo pode participar e sempre hai sitio para cada un”
Na primeira xornada a participación foi baixa, e os exercicios serviron como toma de contacto e para coñecer as normas básicas do deporte. Para animar á xente a participar nas seguIntes semanas, Cala asegura que “todo o mundo pode participar e sempre hai sitio para cada un”.
Polo de agora, só un par de rapazas animáronse a acudir a Acea da Ama para descubrir o rugby da man do CRAT. O coordinador sinala como aínda custa que as mulleres se animen a practicar este deporte, especialmente por ser de contacto, pero tamén recorda ao gran estandarte do club: “O bo que temos é que aquí, na Coruña, as mozas son as que marcan a diferenza”.
O equipo feminino compite na máxima categoría, a Liga Iberdrola, onde desta vez rematou no quinto lugar.
Na modalidade olímpica, con sete xogadoras no campo en lugar das quince habituais, o CRAT tamén compite na máxima división, a Copa da Raíña 7s. Na presente edición, as coruñesas foron as cuartas clasificadas.
O obxectivo do CRAT: contar cun equipo de rubgy inclusivo
No equipo herculino levan xa tempo traballando con asociacións como Aspronaga ou Aspace, pero nesta tempada a pandemia complicou os plans. Neste 2020/2021, o CRAT seguiu adiante con charlas informativas a través de Zoom, e formará parte de campamentos en asociación con Participa grazas a Emalcsa.
Cala: “Queremos dar un paso máis e intentar facer un equipo inclusivo de rugby”
“Agora queremos dar un paso máis e intentar facer un equipo inclusivo de rugby, onde persoas con e sen discapacidade xoguen xuntos. Sen etiquetas”, resume Cala.
