Malia que a Liga Feminina 2 está a piques de chegar á súa fin, os equipos que ocuparán os postos de descenso son aínda unha incógnita. A parte inferior da táboa está moi competida, e o Ulla Oil Rosalía precisa sumar de dous en dous para salvarse. Nesta xornada, as brancas visitan na súa casa ao Azkoitia Azpeitia o domingo, 21 de febreiro, ás 11:00 horas.
Será un reto difícil para un conxunto novato que aposta por loitar e defenderse na segunda mellor categoría do baloncesto español. Na súa contra non xoga só a falta de experiencia, senón un rival que se sitúa entre os máis fortes.
O Azpeitia ocupa a cuarta posición da clasificación, con 33 puntos obtidos en 14 vitorias e 5 derrotas. Pola contra, o Rosalía só suma 25, cun balance case invertido: 5 vitorias e 15 derrotas.
Porén, as xogadoras de Chiqui Barros están a cinco puntos do colista, pero un do penúltimo, e a tres postos do último clasificado. No club compostelán saben ben que unha vitoria pode marcar a diferenza entre o descenso ou a permanencia.
O Rosalía case deu a sorpresa na ida
Ademais, neste segundo enfrontamento entre galegas e vascas, as primeiras poden aproveitar o aprendido no partido de ida.
Na oitava xornada, o Rosalía tamén chegaba con dúas derrotas, pero iso non as freou para facer tremer ao Azpeitia. Para o descanso as vascas só vencían de tres puntos e no último cuarto as galegas foron superiores, pero non o suficiente para remontar un partido que rematou 69-71.
