Un caso positivo detectado no Magec Tías puxo en pausa as boas sensacións e enerxía da vitoria do Ulla Oil Rosalía. O partido da décima xornada non se puido xogar, pero si se celebrará o relativo á undécima. Este será o martes, 8 de decembro, ás 18:30 horas na pista da Agrupación Deportiva Baloncesto Avilés.
As galegas viaxarán a Asturias con sede de vitoria, sobre todo contra un rival directo como é a ADBA que, ademais, chega dunha derrota contra o Celta.
O Rosalía tivo un moi mal inicio de competición que segue lastrando case a metade de tempada. As galegas suman dúas vitorias, a última delas no derradeiro partido que puideron disputar, contra o HGB Ausarta Barakaldo EST.
O Rosalía quere abrirse paso nunha LF2 moi disputada
Así, para este martes, precisan unha vitoria e sumar os dous puntos que as alonxen do fondo da táboa, onde ocupan a penúltima posición con dez puntos e oito partidos xogados.
Ademais de polos nefastos primeiros encontros, esta posición explícase polo feito de que aínda ten varios partidos atrasados por disputar: contra o Maristas, da primeira xornada e contra o Magec, da décima. A Liga Feminina 2 está moi igualada e só catro puntos separan ao Rosalía do sétimo clasificado.
Con todo, ao seu favor xogan as melloras tanxibles que as xogadoras de Chiqui Barros están a demostrar na pista, e que fan delas un duro rival para a ADBA.
O cadro asturiano suma tamén dúas vitorias, pero ten un punto máis que as galegas, o que as sitúa unha posición por riba. Onde tamén é superior é desde a liña de tres, unha zona que o Rosalía deberá defender ben para evitar que as locais se adianten no electrónico.
Este partido, que será determinante na loita por non descender de categoría, celebrarase no complexo deportivo de Avilés, ás 18:30 horas.
