O Ulla Oil Rosalía compite mellor, pero aínda non remata os partidos. O parón motivado pola suspensión do encontro contra o Magec Tías deixou atrás a enerxía da vitoria para as compostelás. As galegas visitaban á Agrupación Deportiva Baloncesto Avilés, rival directo, nun encontro moi igualado pero que decantouse polo lado local cun 52-50.
O partido foi un vaivén de tantos, con oportunidades para ambos conxuntos, que cambiaban o liderato do encontro por momentos. Se nun cuarto dominaban as locais, noutro as visitantes adiantábanse. Finalmente, os últimos minutos foron decisivos para a vitoria que se lles escapou de entre os dedos ás galegas.
Con só un cambio no quinteto inicial do Rosalía respecto ao último partido, saíndo de inicio Maniviesa en lugar de Sara Corredoira, Chiqui Barros demostrou a confianza que ten no seu plantel, que viña dunha vitoria contra o Barakaldo.
Un vaivén de oportunidades para a ADBA e o Rosalía
A ADBA saiu con confianza e moi centrada á súa pista, dominando os primeiros minutos do encontro e logrando duplicar os tantos das visitantes no primeiro cuarto. As asturianas deron coa clave para frear a Leticia Soares por parte do Rosalía e impoñíanse cunha diferenza de nove puntos pasados os primeiros dez minutos.
Para o seguinte cuarto, as pupilas de Barros reaccionaron e marcaron o ritmo de xogo grazas ás actuacións desde a liña de tres de Clara Riera por partida dobre e de Sara Corredoira. Cun parcial de 0-9, o marcador sinalaba un resultado moi axustado dun 22-21 para o tempo de descanso.
A pausa serviu para que o conxunto local recuperase enerxías e, lideradas por Artémis Barbosa, lograron nos primeiros minutos da segunda parte nu parcial de 7-0, marcando a distancia no electrónico.
O ritmo do rival e a falta de solucións para frealo en defensa fixo que o adestrador compostelán solicitase un tempo morto. Tras esta pausa, as galegas invertiron o parcial, cun 0-7 ao seu propio favor, deixando unha vez máis o resultado do encontro completamente aberto.
Intensos minutos finais
O último cuarto, moi tenso, seguía sendo un interrogante sobre quen se levaría a vitoria. A falta de cinco minutos para o final, o Rosalía asinou un parcial 0-6, cunha canasta de Soares que fixo que o técnico rival, o ferrolán Sergio Cubeiro, pedise un tempo morto.
A vitoria era vital para ambos equipos, rivais directos pola permanencia, polo que cada segundo podía marcar o futuro das xogadoras. Durante a última metade do último tempo, ambos conxuntos tiñas problemas para chegar á zona contraria e o marcador quedou conxelado nun 44-44.
Da falta de efectividade fronte á canastra pasouse a unha alternancia constante de ocasións nos últimos dous minutos. O acerto de Corredoira a falta de vinte segundos, logrando un 49-50 no marcador non foi suficiente. De Sousa non desaproveitou a súa oportunidade para encestar os seus dous tiros libres tras unha falta. Como colofón para as locais, Fraile anotou un punto final por unha técnica do banco visitante.
As xogadoras do Rosalía voltaron a casa sen dous puntos cruciais, pero coa satisfacción de ter loitado ata polo último balón. O seguinte reto será en casa, contra o Osés Construcción Ardoi, o domingo ás 17:00 horas. Un óso duro de roer pola súa cuarta posición, pero ante o cal as galegas non poden ceder se queren alonxarse das colistas.
FICHA TÉCNICA
52) AGRUPACIÓN DEPORTIVA BALONCESTO AVILÉS: Artemis Barbosa (21), De Sousa (9), Sara Fraile (6), Laura Martínez (-) e Devon Brookshire (10) -cinco inicial-. Tamén xogaron: Montalbán (-), Guimaraes (-), López (2) e Velasco (4).
50) ULLA OIL ROSALÍA: Carla García (-), Nuria Chorén (9), Maniviesa (2), Ángela González (2) e Leticia Soares (14) -cinco inicial-. Tamén xogaron: Ana de Matías (-), Rivas (-), Corredoira (12), Alba Rama (-), Carro (2), Riera (7) e Liste (2).
PARCIAIS: 18-9, 4-12, 20-17 e 10-12
ÁRBITROS: Alejandro Pellitero e Omar González. Foi liminada do Rosalía Leticia Soares.
INCIDENCIAS: Partido correspondente á undécima xornada da Liga Feminina 2 disputado no complexo deportivo Avilés.
