As pantasmas do descenso ameazaban ás xogadoras do Ulla Oil Rosalía, pero á primeira oportunidade o plantel branco foi quen de alonxalas. Cunha vitoria ante a ADBA (69-53), as galegas cámbianlle ás asturianas a posición na táboa, logrando momentaneamente a permanencia.
Estes dous puntos, que rompen a racha de derrotas nas que estaban sumidas as baloncestistas de Chiqui Barros, dan motivos para a esperanza. No Grupo A, no que militan todas as galegas, só descenderá o último clasificado e, malia que a zona baixa está rifada, actualmente esta praza a ocupa a ADBA.
Reacción a tempo
Os dous equipos, conscientes do que estaba en xogo na pista do Instituto Rosalía, saltaron á cancha coa intensidade como bandeira desde o minuto 1.
Os primeiros compases do partido deixaban entrever un duelo emocionante e igualado, no que todo estaba en xogo. Así, os primeiros acertos foron para as visitantes, que sumaban de tres en tres e así ata catro veces, colocándose moi rápido por diante.
Como resposta, o Rosalía atacaba coa súa pívot brasileira, que remataría sendo a MVP do encontro, recortando distancias, pero sempre sen chegar a alcanzar ás asturianas (15-19).
Pero as locais non ían deixar escapar este partido fundamental, e no segundo cuarto deron un golpe sobre a mesa e asumiron o control do xogo. Atentas nos 2×1 nas defensas e forzando o tiro exterior das rivais, cada vez máis irregulares, as xogadoras de Chiqui Barros atoparan a fórmula para conter á ADBA.
Cun triplo de Blanca Manivesa acadouse unha renda de dez puntos que xa non soltarían no restante de cuarto. Do 30-20 o partido pasou ao 37-27 no descanso, co único perigo no bando rival de Barbosa.
Salvación grazas ao traballo en equipo do Rosalía
Tras o paso por vestiarios, o Rosalía continuou concentrado nun xogo coral con Ángela González e Leticia Soares como protagonistas. Dous triplos de Clara Riera afastaban aínda máis ás galegas das competidoras, poñendo terra de por medio coas visitantes.
A contundente defensa local impedía que a puntuación da ADBA medrase, polo que a distancia entre os dous equipos no electrónico non facía máis que medrar.
O Rosalía xa comeza a ser un equipo con galóns para aguantar os esixentes partidos da LF2, e no último cuarto aguantaron tan frescas como nos anteriores. Os erros non foron motivo de desánimo, e coa vista posta no trunfo ao final o acadaron.
Desta forma, o mellor partido desta tempada tamén foi o máis determinante. O resultado final do 69-53 serve para sumar os puntos da vitoria e levarse o average, deixando ás rivais na última posición.
Porén, malia que quedan dous partidos en xogo e a priori o Rosalía depende de si mesmo, os dous últimos rivais serán Ardoi e BAXI Ferrol, os dous equipos máis fortes da categoría, polo que un trunfo máis será complicado de asumir.
Á fin desta xornada, as compostelás son penúltimas, con 30 puntos, a un das colistas e empatadas co Magec Tías e AD Cortegada.
FICHA TÉCNICA
69) ULLA OIL ROSALÍA: Carla García (-), Sara Corredoira (7), Ángela González (8), Sarai Carro (2) e Leticia Soares (25) – quinteto inicial -. Tamén xogaron: Nuria Chorén (1), Clara Riera (10), Nerea Liste (4) e Blanca Manivesa (12).
53) AGRUPACIÓN DEPORTIVA AVILÉS: Barbosa (22), De Sousa (12), Fraile (2), Martínez (2), López (2) – quinteto inicial -. Tamén xogaron: Guimaraes (10), López (2) e Dias Allen (1).
PARCIAIS: 15-18, 22-9, 20-17 e 12-9.
ÁRBITROS: Adrián Álvarez e Andrés Esteban Domínguez.
INCIDENCIAS: Partido da 24ª xornada da Liga Feminina 2 disputado na pista do Instituto Rosalía ante 150 espectadores.
