A recuperación da primeira xornada da Liga Feminina 2 chegaba cun duelo galego entre o Ulla Oil Rosalía e o Maristas Coruña, nun partido vital para a loita pola permanencia de ambos equipos. As compostelás xogaron en casa e gañaron por primeira vez ante a súa afección, mentres o Maristas continúa nunha espiral de derrotas que as leva á parte baixa da táboa.
Ambos conxuntos deron mostra dun partido moi competido e igualado e seguiron coas sensacións obtidas dos encontros previos. O Rosalía está a asentarse na categoría da que é novato e comeza a afianzarse nos partidos e a plantar cara, mentres que as coruñesas non levantan cabeza e acumulan unha racha de cinco derrotas consecutivas.
O adestrador do equipo local, Chiqui Barros, comentaba no post partido como “xogamos un moi bo partido, contra un rival ao que respetamos moito e que nos custa polo seu tipo de xogo e físico. Mérito enorme do equipo”.
Pola súa banda, Blanca Manivesa, do Rosalía declaraba que “sabíamos que ía ser un partido importante, contra un equipo que ía estar aí aí con nós e empezamos moi ben. No terceiro cuarto se intentaron meter e aguantamos moi ben ata o final”.
Terceira vitoria vital para o Rosalía
O marcador amosaba nos primeiros minutos do partido a igualdade sobre a pista entre ambos conxuntos galegos. O comezo do encontro non tivo líder claro, e os dous equipos tiveron acertos en defensa e en ataque, terminando os primeiros dez minutos cun 19-19 no electrónico.
Para o segundo tempo, o Rosalía decidiu tomar as riendas do partido e crecerse xogando en casa, e deu un golpe de autoridade para facerse co ritmo do duelo. Con moito acerto fronte á canastra, a puntuación das locais non deixaba de crecer e o Maristas non era quen de parala. Para o tempo de descanso, as de Barros xa se ían de 14 no marcador.
Á volta de vestiarios, o equipo dirixido por Jorge Carreira reaccionou e subiu o nivel dos seus ataques, con bos tiros desde o campo e desde a liña de tres, reducindo a distancia no electrónico.
Chiqui Barros adestrador do Rosalía: “Soubemos saír da súa presión no momento no que elas podían estar preto polo seu traballo”
Malia levarse o terceiro cuarto, non foi suficiente para poñerse por diante, e as coruñesas aínda perdían de nove a falta de dez minutos. “Soubemos saír da súa presión no momento no que elas podían estar preto polo seu traballo”, indicou o adestrador branco.
No último parcial, as xogadoras compostelás volveron a facerse co partido, aguantando o resultado e incluso asinando máis tantos que o rival. “Un par de triples e un par de 1 contra 1 nos deron a tranquilidade de estar por diante”, explicaría despois Chiqui Barros.
Chiqui Barros: “O meu agradecemento e felicitación ás xogadoras porque creo que fixeron un partido soberbio”
O resultado final, 88-72, o Rosalía segue medrando na categoría cunha terceira vitoria que “afianza ao conxunto como un equipo competitivo desta Liga”, en palabras do técnico. “O meu agradecemento e felicitación ás xogadoras porque creo que fixeron un partido soberbio”, engadiría despois.
Pola contra, o Maristas o ten cada vez máis difícil para dar coa fórmula da vitoria e pouco a pouco estáncase na parte baixa da clasificación, onde acumula nove derrotas, cinco delas seguidas.
Duelos galegos coas grandes da Liga para rematar o 2020
Estes equipos galegos aínda teñen un reto moi grande por diante antes de que remate o 2020. Será ante dous dos mellores equipos da categoría, o BAXI Ferrol para as de Santiago e o Celta Zorka Recalvi para as da Coruña.
Ambos encontros celebraranse o sábado, 19 de decembro, o primeiro deles ás 17:00 horas e o segundo ás 20:30 horas.
FICHA TÉCNICA
88) ULLA OIL ROSALÍA: Ana de Matías (-), Carla García (20), Rivas (2), Corredoira (16) e Carro (-) -cinco inicial-. Tamén xogaron: Chorén (17), Maniviesa (11), Ángela González (-), Clara Riera (5), Nerea Liste (17), Alba Rama (-) e López (-).
72) MARISTAS CORUÑA: Martínez (7), Casal (8), Cortés (6), Filgueira (8) e Cervelo (10) -cinco inicial-. Tamén xogaron: Joana Pereira (10), Feijoo (9), Galán (2), Ruiz (0-) e Andrea Pérez (12).
PARCIAIS: 19-19, 27-13, 15-20 e 27-20.
ÁRBITROS: Roi Rilo e Iris Feijóo. Eliminaron a Laura Martínez e a Cervelo, do Maristas Coruña.
INCIDENCIAS: Partido correspondente á primeira xornada (adiada) da Liga Feminina 2 disputado no Instituto Rosalía (Santiago de Compostela).
