O tempo esgótase e con el as oportunidades de salvar a categoría. O Ulla Oil Rosalía precisa urxentemente unha vitoria para escapar do descenso e da penúltima praza que agora ocupa. A primeira oportunidade será ante o HGB Ausarta Barakaldo, o sábado, 27 de febreiro, ás 17:00 horas.
Quedan uns dez puntos en xogo, e previsiblemente do Grupo A só descenderá o colista, que actualmente é o Magec Tías. Porén, a metade inferior da táboa está moi igualada e calquera podería rematar nesa posición.
Un dos equipos que afronta este perigo é o Rosalía. Novato na categoría, as pupilas de Chiqui Barros loitan por permanecer unha tempada máis na categoría de prata, a Liga Feminina 2. Polo de agora, o futuro preséntase complicado, xa que con 26 puntos son as penúltimas clasificadas.
Empatadas con elas están AD Cortegada e ADBA e cun punto máis Maristas Coruña e CB Arxil. Todo está por decidir de aquí a final de tempada.
Vencer ao Barakaldo: reto do Rosalía para salvarse
Pase o que pase, non hai permanencia sen vitorias, e no conxunto compostelán deberán traballar para vencer ao Barakaldo. Xa o fixeran na primeira volta, na que foi a súa segunda vitoria da tempada.
Dando a sorpresa da xornada, as de Barros venceron a domicilio ás vascas. Controlando o tempo desde os primeiros compases de partido, as brancas fixéronse coa vitoria malia un mal terceiro cuarto que podería ter posto en perigo o seu trunfo.
Unha volta despois, galegas e vascas vense de novo as caras. O Barakaldo segue sendo superior sobre a clasificación, pero actualmente é o equipo en peor racha: acumula catro derrotas consecutivas.
Este mal momento deportivo non fai que o seu futuro se vexa ameazado, xa que o seu bo facer nas anteriores xornadas permítelle manterse na metade da táboa malia levar un mes sen coñecer a vitoria.
Esta poderá ser unha gran oportunidade para o Rosalía de volver a sumar os dous puntos e aumentar as súas posibilidades de competir un ano máis na segunda mellor categoría do baloncesto español.
O partido desta segunda volta poderá seguirse vía streaming no Canal FEB.
Volve Carla
Para esta nova xornada, Chiqui Barros poderá volver a contar con Carla nas súas aliñacións. A xogadora branca perdeuse o partido ante o Azkoitia por molestias pero estará lista para competir contra o Barakaldo. Tamén xogará Sara Corredoira.
Quen non estará é Sarai Castro, que segue de baixa e está pendente dunha resonancia para examinar a súa lesión de xeonllo.
🏆 #LF2 J22
⚔️ Ulla Oil @RosaliaFEDESA 🆚 HGB AUSARTA @BARAKALDO__EST
📆 Sábado, 27/02/2021
⏰ 17:00 H.
🏟️ Pabellón Instituto Rosalía
📌 Santiago de Compostela
📺 https://t.co/6eiVoIjllH
💪🏀🏃♀️💙🤍#VamosRosa #LF2@deporte_galego @dxtSan @FGB_Baloncesto @CompeticionFEB pic.twitter.com/uIDapCMOrF— Rosalia FEDESA (@RosaliaFEDESA) February 26, 2021
