En Santiago ven perigar a permanencia. O Ulla Oil Rosalía cámbialle o posto de colsita ao Magec Tías tras perder na súa visita ás canarias (70-61) no que é a súa quinta derrota consecutiva. As compostelás son o novo farolillo vermello da Liga Feminina 2.
Este era un duelo directo que pode definir o futuro dos equipos da zona baixa da clasificación. Ata esta xornada, o Magec Tías era o favorito a descender, nun pozo na LF2 foi rifado. Nas últimas xornadas as canarias comezaron a rexurdir á vez que as novatas da categoría, o Rosalía, estancábase nun mal momento deportivo que as castiga ocupando agora a última posición.
O Rosalía comezou sendo superior
Na primeira metade todo parecía indicar que as compostelás serían as vencedoras dos dous puntos da vitoria.
O equipo de Chiqui Barros comezou cun parcial 0-5 que foi unha declaración de intencións. O Rosalía viaxara ata as Canarias para gañar e non ía renderse facilmente. Nuria Chorén, cun tiro de dous, e Sara Corredoira, cun triplo, abrían a lata para as visitantes.
Pero o Magec tamén tiña ganas de pelexar, e respondeu fortemente desde o rebote ofensivo. Porén, o seu escaso acerto baixo canastra permitiu que as galegas aumentaran a súa renda no marcador, situándose por diante cun colchón de varios puntos. O primeiro tempo rematou cun triplo de Ángela González sobre a bocina, poñendo o 9-17.
O segundo cuarto serviu para aumentar esa distancia, cun gran control do rebote na canastra do Rosalía e aproveitando cada ocasión. Así a diferenza crecía ata os 21 puntos de distancia, cando faltaban seis minutos para o descanso.
De novo, Corredoira, Chorén e González mantiveron por todo o alto ás brancas, que vían a vitoria máis preto, malia un parcial 6-0 que achegaba ás canarias (31-45).
O Magec remontou un partido importantísimo na segunda metade
Co comezo da segunda metade o partido deu un xiro de guion. O Magec saiu reforzado de vestiarios e achegábase perigosamente, xogando contra un Rosalía que se acomodaba na súa vantaxe. Cun parcial 8-0 as locais vislumbraban a remontada.
Cun triplo da man de Sara Duarte, as locais víronse arriba e presionaban ás brancas poñéndoas contra as cordas. Ante este panorama, Chiqui Barros solicitaba parar o cronómetro para facer reaccionar ás súas. Unha canastra de Leticia Soares no minuto 28 foi o último tanto das compostelás neste tempo, mentres que as rivais asinaban un parcial 13-0 que as deixaba a un triplo de distancia.
O último cuarto comezaba co resultado completamente aberto para a vitoria de calquera dos dous equipos. No local, a galega Regina Gómez tomaba a iniciativa, mentres que o seu equipo defendía con intensidade. A tensión que se vivía na pista de Tías facía que o técnico visitante fora amonestado por protestar os contactos.
As canarias ían xa por diante, pero calquera esperanza do trunfo branco desapareceu cun parcial demoledor. O Magec asinaba un 23-0, atascando por completo a un Rosalía que se quedaba sen resposta.
A primeira canastra das visitantes neste cuarto tan relevante chegaba a dous minutos do final, cando o luminoso informaba do 64-57. O conxunto de Barros seguiu loitando sen acerto, deixando finalmente cun 70-61 os dous puntos en Lanzarote e volvendo a Galicia como colistas.
O futuro pinta complicado para as galegas, que nas próximas xornadas xogan contra a ADBA, empatadas a puntos, Ardoi, segundo clasificado, e BAXI Ferrol, o líder indiscutible.
FICHA TÉCNICA
70) MAGEC TÍAS CONTRA LA VIOLENCIA DE GÉNERO: Regina Gómez (18), Giardina (16), Mateo (10), Haidara (10) – quinteto inicial -. Tamén xogaron: Duarte (3), Drake (-), García (-) e Milandu (-).
61) ULLA OIL ROSALÍA: Corredoira (20), Chorén (10), Ángela González (11), Carla García (2), Leticia (10) – quinteto inicial -. Tamén xogaron: De Matías (-), Riera (-), Liste (-) e Manivesa (8).
PARCIAIS: 9-17, 22-28, 21-12 e 18-4.
ÁRBITROS: Marcos Silva e Javier Beneitez. Eliminadas, con cinco faltas personais, a local Carolina Mateo e a visitante Nuria Chorén.
INCIDENCIAS: Partido da 23ª xornada da Liga Feminina 2 disputado na pista de Tías. Sen público.
