Coa Liga Feminina 2 xa na súa fase final, ao Ulla Oil Rosalía acábaselle o tempo para afianzar a permanencia. O equipo que adestra Chiqui Barros sabe que cunha vitoria moito do camiño xa estaría percorrido, pero este trunfo aínd está por chegar. O partido do sábado contra o Vega Lagunera Adareva Tenerife terminou en derrota por un un tanteo final de 59-62.
O novato equipo compostelán viuse con opcións de gañar, pero os erros debidos á súa falta de experiencia fixeron do Vega Lagunera Adareva Tenerife un “xusto vencedor”, en palabras do propio adestrador das de Santiago, Chiqui Barros.
Para un partido “igualado, pero sempre controlado por Vega Lagunera Adareva Tenerife“, en contra de todo pronóstico, Barros puido contar con Leticia Soares, que foi dúbida ata o último minuto.
O Ulla Oil Rosalía tivo na man a vitoria
Malia as evidentes diferenzas físicas entre canarias e galegas, as segundas poden presumir de ter mantido o pulso ao actual sétimo clasificado da Liga Feminina 2.
Nos primeiros compases do partido a batuta cambiaba de bando, marcando un ritmo moi igualado entre locais e visitantes. A igualdade reinaba no marcador e na pista, deixando o empate á fin do primeiro cuarto (19-19).
Para o segundo parcial, a temida Dembele fixo gala do seu talento na pista do Rosalía e poñía por diante ao seu equipo. Os puntos das canarias, sumados dun en un desde a liña do tiro libre na súa maioría, tiñan contestación nos triples de Carla García e Nuria Chorén, o que mantiña a igualdade no luminoso, pero con lixeira vantaxe para as visitantes (31-37).
No terceiro tempo, o Vega Lagunera Adareva Tenerife seguía ampliando a súa renda a costa do Rosalía, aproveitando os erros propios da súa falta de experiencia.
Xa o advertía Chiqui Barros na previa: o rebote sería un factor importante neste partido. E así foi. As visitantes controlaban os rebotes sen problemas, o que lles permitía sumar puntos con máis facilidade. Desta forma remataba o teceiro cuarto, coas canarias gañando por unha vantaxe de nove puntos sobre as galegas.
Pero o Ulla Oil Rosalía non ía renderse tan facilmente. Un triple de Chorén ao inicio do último cuarto deixaba claras as intencións de remontada por parte das compostelás.
Porén, o progreso galego viuse freado por Dembelé, que mantiña ao Vega Lagunera Adareva Tenerife por diante liderando o xogo ofensivo canario e bloqueando ás brancas. Catro minutos sen anotar por parte do equipo local permitiulle ás canarias ampliar a súa vantaxe, situando o electrónico nun 48-60 a falta de seis minutos.
O Ulla Oil Rosalía aínda tiña moito que dicir, e guiadas por Blanca Manivesa as galegas asinaron un contundente parcial 11-0 que poñía contra as cordas ás rivais. Xogando sen pívots, o conxunto adestrado por Barros case foi capaz de darlle a volta ao marcador.
Con todo, as galegas tiveron que contentarse con rozar a vitoria e ser protagonistas dun gran partido, no que os dous puntos da vitoria viaxaron a Canarias da man do Adareva.
As claves da derrota segundo Barros
Os cinco puntos que separan a Ulla Oil Rosalía e Adareva na clasificación da LF2 non son mostra do que se viu sobre a pista. Ambos equipos ofreceron un duelo igualado, no que as canarias demostraron o seu maior coñecemento da categoría, o que lles serviu para facerse co trunfo.
Chiqui Barros: “Hai rebotes que nos gañan por físico pero outros que nos gañan por falta de concentración”
Unha das explicacións que se esconden tras esta derrota para as brancas está no “dominio do rebote do rival, cousa que sabiamos e que é imperdoable pola nosa parte. Hai rebotes que nos gañan por físico pero outros que nos gañan por falta de concentración e non pechar facendo o que temos que facer”, analiza Chiqui Barros.
O ritmo de xogo “estático e parado” desfavoreceu ás galegas, que non foron capaces de facer circular o balón de maneira fluída e non soubo “ocupar ben os espazos”, nin xogar ben “sen balón”.
A xogadora Clara Riera coincide co análise do seu adestrador, apuntando que as contrincantes “castigaron os nosos erros defensivos”.
Aspecto a mellorar: evitar os tiros ao poste
Un dos principais fallos que se puido ver no conxunto galego foron os tiros ao poste. “Xa tiramos ao poste en Pontevedra contra o Arxil, en Avilés contra ADBA e temos que ser máis duras nestas situacións para ser capaces de gañar máis do que perdemos. Pero é a peaxe que hai que pagar cun equipo xove e inexperto como o noso”, sinala Barros.
Chiqui Barros: “Temos que ser máis duras nestas situacións para ser capaces de gañar máis do que perdemos”
Para correxir este erros recurrente, o Ulla Oil Rosalía ten que seguir adestrando ben para mostrar sobre a pista o seu nivel. “Non queda outra que felicitar ao Adareva porque gañou con xustiza”, concluía o adestrador. Porén, tamén quixo matizar que “o resltado di que tivemos opcións, o que tamén é certo, pero o Adareva foi o equipo que máis méritos fixo para levarse o partido”.
Coa vista posta nos seguintes retos
Malia ter xogado contra as canarias un partido importante para salvar a categoría, as brancas teñen xa a vista posta no seguinte encontro. “Era un partido moi importante pero a Liga segue e quedan moitos máis. Isto segue formando parte do proceso de aprendizaxe”, apunta Chiqui Barros.
O seguinte duelo será contra o 21 de febreiro, ás 11:00 horas, contra o Azkoitia Azpeitia.
FICHA TÉCNICA
59) ULLA OIL ROSALÍA: Sara Corredoira (12), Sarai Carro (6), Nuria Chorén (9), Carla García (7) e Leticia Soares (8) – quinteto inicial -. Tamén xogaron: Ana de Matías (0), Paula Rivas (0), Ángela González (0), María López (0), Clara Riera (2), Nerea Liste (4) e Blanca Manivesa (11).
62) VEGA LAGUNERA ADAREVA TENERIFE: Dembele (26), Basaez (7), Ibañez (6), Luque (8) e Negrín (10) – quinteto inicial -. Tamén xogaron: Villa (0), Luque (0), Reynes (0), Exposito (0) e Ilunga (5).
PARCIAIS: 19-19, 12-18, 12-15 e 16-10.
ÁRBITROS: Iván Escariz e Omar González. Eliminadas no Ulla Oil Sara Corredoira e Blanca Manivesa.
INCIDENCIAS: Partido da 20ª xornada da Liga Feminina 2 disputado no pavillón do IES Rosalía de Castro a porta pechada por mor das restricións vixentes dictaminadas pola Xunta de Galicia para evitar a transmisión da COVID-19 na comunidade.
