A tempada complícaselle ao Ulla Oil Rosalía, que non tivo opcións de contestar a un contundente Azkoitia Azpeitia ISB. As galegas volveron a Santiago de Compostela cunha contundente derrota ante as vascas (80-59).
Con este resultado, a terceira derrota consecutivas nas filas brancas, o equipo compostelán ocupa a penúltima posición da Liga Feminina 2, con 26 puntos.
Pouco durou o Rosalía en pista
Saíron enchufadas as xogadoras de Chiqui Barros, loitando cada balón en plantándolle cara a un dos rivais máis duros da LF2.
As defensas ensaiadas durante a semana xurdiron efecto para paralizar momentáneamente ao Azpeitia, poñendo o foco sobre a base Morgan Green. A excelente actuación das brancas serviu para frear á segunda máxima anotadora da competición quen, por primeira vez, rematou un cuarto sen anotar.
No relativo ao ataque, con Blanca Manivesa e Ángela González liderando, as galegas conseguían adiantarse no marcador forzando balóns perdidos. Un gran parcial 0-7 coas dúas brancas antes mencionadas como protagonistas poñía o 15-16 no marcador ao remate do primeiro cuarto.
Porén, para o segundo mudou o conto. O Rosalía non aguantaba o ritmo esixente das vascas e estas aproveitaron os erros das novatas. Un demoledor parcial 11-2 a favor das locais, con Green xa recuperada e encamiñou a vitoria do Azpeitia.
Unha ducia de puntos por debaixo no primeiro tempo
Para o comezo da segunda metade, as compostelás xa perdían de 12 puntos. Tras o paso por vestiarios as brancas saíron con gañas pero sen acerto. Barros seguía probando distintos esquemas defensivos sen acerto, mentres que o cadro local seguía avanzando sen parar no luminoso.
A diferenza chegou ata os 24 puntos, cun Rosalía paralizado e sen xogo. Green, Iparragirre, Effa e Primm anotaban a pracer para o conxunto vasco que xa tiña o partido medio resolto.
Porén, o equipo visitante seguiu empurrando e saíu inspirado ao último cuarto, asinando un sorprendente 0-8 ao inicio do último tempo e recortando distancias ata o 66-54.
A remontada quedou nun desexo non cumprido, e o acerto do Rosalía deixou de sumar, mentres que as locais non paraban. O cadro de Barros non foi quen de dar coa clave para manter a raia ás xa terceiras clasificadas, que remataron o duelo co 80-57 final.
A falta de cinco xornadas para o final, as galegas ocupan a penúltima posición nunha cola moi competida e igualada, onde os descensos non se decidirán ata o final de tempada.
FICHA TÉCNICA
80) AZKOITIA AZPEITIA ISB: Lizarazu (6), Lizundia (5), Effa (12), Green (19) e Primm (14) – quinteto inicial -. Tamén xogaron: Iparragirre (19), Aranbarri (0), Altzaga (2), Otaegi (1) e Sanjuan (2).
57) ULLA OIL ROSALÍA: Sara Corredoira (9), Ángela González (10), Leticia Soares (11), Clara Riera (4) e Blanca Manivesa (15) – quinteto inicial -. Tamén xogaron: Ana de Matías (0), Paula Rivas (2), Nuria Chorén (2), Marta López (0) e Nerea Liste (4).
PARCIAIS: 15-16, 25-12, 25-16 e 15-13.
ÁRBITROS: Alexis Fuentes e Mikel Uriarte. Eliminada a pívot do Rosalía Leticia Soares.
INCIDENCIAS: Partido da 21ª xornada da Liga Feminina 2 disputado no polideportivo Azkoitia.
