O Ulla Oil Rosalía logrou na última semana repoñerse do mal momento que estaba atravesando en canto a resultados, pero este sábado, 6 de febreiro, ten un reto que pode poñer en perigo a súa estabilidade. Visitarán ao Extremadura Miralvalle Plasencia, cuarto clasificado da LF2, ás 18:30 horas.
O equipo que dirixe Chiqui Barros chega dunha vitoria lograda nos últimos minutos ante un rival directo e compatriota, a AD Cortegada. Este duelo galego foi un deses partidos que poden determinar por completo o futuro dos clubs que se xogan a permanencia e, neste caso, foi favorable ás compostelás.
Antes deste disputado encontro, as brancas recuperaron a xornada adiada co colista, o Magec Tías, nun partido que tamén rematou en vitoria para o Rosalía. Sumando este trunfo ao logrado contra o Cortegada, as compostelás deron na mesma semana dous pasos de xigante para ter máis opcións de salvar a categoría.
Porén, este sábado esta confianza que están gañando as de Barros pode perigar. O seu rival para esta 19ª xornada é o equipo revelación da Liga Feminina 2: o Miralvalle.
Dous novatos con resultados dispares
Malia a súa inexperiencia na categoría de prata, as extremeñas estanse colocando como un dos equipos máis fortes da Liga Feminina 2 e un rival complicado.
Dos 17 partidos que leva disputados, o Miralvalle venceu en 12 ocasións e perdeu só en cinco, o que o deixa na cuarta posición con 29 puntos.
As que competirán como locais nesta xornada son ademais un dos clubs mellor valorados, cunha media de 67 puntos neste campo. Tamén destacan desde o tiro libre, cunha efectividade de case o 69% de media.
Distinta sorte corren as compostelás do Rosalía. As brancas tamén son novatas na LF2, pero teñen máis problemas para transformar o seu talento en puntos.
Despois de 18 encontros, as galegas ocupan o décimo posto na táboa, a só catro puntos das actuais colistas. Con todo, as de Chiqui Barros venceron a dous rivais directos na última semana e igualan en puntos á ADBA.
Ao seu favor tamén está o nivel individual dalgunhas xogadoras do seu plantel. O Rosalía ten á unha das máximas anotadoras da competición: Leticia Soares. No que vai de tempada, a brasileira supera os 200 puntos anotados.
