A tempada na Liga Feminina 2 avanza e a loita pola permanencia na parte inferior da táboa está moi competida. Oito puntos separan a colista e sétimo clasificado, e dentro desa franxa están dous equipos galegos que xogaron entre si a pasada fin de semana: o Ulla Oil Rosalía e a AD Cortegada. Un duelo galego que rematou en vitoria local, tivo que ser afianzado nos segundos finais (67-63).
Un partido que deu mostra do igualado da competición e no que os corenta minutos non bastaron para decidir a un gañador. Finalmente, os dous puntos do trunfo quedaron en Santiago de Compostela, sacando brevemente ao Rosalía do pozo, onde o Cortegada ocupa a penúltima posición.
Na previa, o adestrador local Chiqui Barros sinalaba que, de gañar, o seu equipo daría un paso importantísimo cara o obxectivo e suporía “case” a salvación da categoría. Non se equivocaba. Tras vecer a un rival directo como é o Cortegada, as brancas ocupan a décima posición, empatadas a puntos coa ADBA e o Maristas Coruña e a catro do oitavo, o Vega Lagunera Adareva Tenerife.
Pola contra, as de Vilagarcía quedan enterradas sendo segundas pola cola, a un punto do colista, e coa peor racha de derrotas consecutivas na LF2. Ademais, as pupilas de Nogueira son o segundo equipo con máis puntos en contra, só por detrás do Maristas.
O cambio de pista non afectou ao Rosalía
O duelo celebrouse en terras compostelás, pero non na habitual pista do Instituto Rosalía. O feudo das brancas ten o parqué en mal estado, obrigando ás xogadoras a disputar o partido no Municipal de Fontiñas, sen que isto afectase ao seu xogo.
As de Chiqui Barros deron mostra da súa calidade, que compensa con creces a súa inexperiencia na categoría de prata. As baloncestistas estiveron pelexando duramente o partido ante un Cortegada que creaba oportunidades constantes.
O talento individual das visitantes, materializado en baloncestistas como Patricia Vicente (MVP do partido con 16 puntos valorativos), viuse compensado no bando rival por unha forte defensa.
As brancas saíron confiadas ao terreo de xogo, controlando ás contrincantes e o tempo do partido, con efectividade tamén no ataque. A vantaxe de sete puntos lograda ao término do primeiro cuarto remataría por ser vital para o desenlace do encontro.
No segundo cuarto, as visitantes deixaron claro que non morirían sen pelexar, e as tornas cambiaron, coas de Vilagarcía controlando desta vez o ritmo do xogo.
O Cortegada non perdoaba desde o tiro libre, e recortaba distancias coas locais. Así chegou o descanso, no que o Rosalía mantiña a superioridade, pero agora xa pola mínima (35-33).
O partido estivo igualado ata os instantes finais
Tras o paso por vestiarios, ambos equipos saíron descansados e refrescados á pista, dispostos a manter o pulso. As de Vilagarcía seguían apretando, pero o maior acerto desde a liña de tres facía que as compostelás aumetasen lixeiramente a distancia no electrónico.
Só quedaban dez minutos para o final, cando as de Nogueira apretaron o acelerador e convertíronse nunha muralla en defensa, deixando o resultado aínda aberto. As canastras entraban por igual aos dous lados da pista e o partido tivo que decidirse nos segundos finais.
Nos últimos 40 segundos dous tiros libres de Sara Corredoira, unha canastra de Riera e o acerto desde a liña de tiro libre de Blanca Manivesa sentenciaron o encontro. O Cortegada a tivo ata o final, pero a efectividade das brancas foi superior, deixando os dous puntos en casa.
Así o Rosalía asinou a súa quinta vitoria ante o equipo que lle deu a primeira no partido de ida, e suma dous puntos importantísimos. Para a próxima fin de semana, as compostelás visitarán ao Miralvalle.
Pola súa parte, o Cortegada non pode dar por perdida a tempada. Este sábado teñen unha nova oportunidade de puntuar ante un rival directo, recibindo en casa ao CB Arxil.
Enhorabuena chicas!!!#LlegóLaQuinta pic.twitter.com/KFgLjVLvjO
— Rosalia FEDESA (@RosaliaFEDESA) January 30, 2021
FICHA TÉCNICA
67) ULLA OIL ROSALÍA: García (10), Chorén (5), Corredoira (10), González (13) e Soares (18) -quinteto inicial-. Tamén xogaron: De Matías (-), Carro (-), Riera (4), Liste (2) e Manivesa (5).
63) AD CORTEGADA: Vicente (19), Sara Gómez (18), Lorena, Loureiro (9) e Sedlakova (9) -quinteto inicial-. Tamén xogaron: Presas (-), Miriam (2) e Wanyama (6).
PARCIAIS: 22-15, 13-18, 17-15 e 15-15.
ÁRBITROS: Peleteiro e Martínez. Sinalaron 22 faltas ao Rosalía e 15 ao Cortegada. Tamén recibiron técnicas Javier Nogueira e Sara Gómez.
INCIDENCIAS: Partido correspondente á 18ª xornada da Liga Feminina 2 disputado no Municipal de Fontiñas de Santiago de Compostela.
