Quedan oito puntos en xogo na Liga Feminina 2, e o Ulla Oil Rosalía aínda ten posibilidades de salvarse. Unha oportunidade de ouro será esta fin de semana, co enfrontamento do sábado 6, ás 19:00 hora canaria, ante o colista, o MagecTías Contra la violencia de género.
O advirte o adestrador, Chiqui Barros, “nin quen parece salvado o está, nin quen vai de último quere dicir que vaia descender. Quedan moitas cousas por dicir”. Só un punto separa ás galegas do Rosalía (5V, 17D) das canarias do MagecTías Contra la violencia de género (4V, 18D), unha distancia que as primeiras intentarán aumentar.
O colista é un equipo “reforzado”
Por estes motivos, e como subliña o técnico, este encontro ten “dobre valor”. Sumar os dous puntos non será nada doado, xa que o MagecTías Contra la violencia de género é un coxunto que chega “moi reforzado” a este tramo final da competición.
En palabras de Barros, as canarias destacan por ser un rival “cun potencial no perímtro moi grande, moitos puntos en calquera das xogadoras do seu perímetro. Son moi equilibradas no xogo interior con postes capaces de abrir o campo no 1 contra 1 e cunha incorporación que lles da quilos e centímetros e que demostra que queren competir ata o final”, analiza o adestrador.
Ana de Matías: “Iremos dalo todo”
Unha das súas xogadoras, Ana de Matías, coincide en tildar a este duelo como “diferencial” para o futuro das compostelás na categoría de prata. Por ese motivo, a xogadora asegura que “iremos a dalo todo”.
Tamén será moi relevante para as brancas a seguinte xornada. Na súa volta a casa as galegas reciben á ADBA (Agrupación Deportiva Baloncesto Avilés), tamén na loita por non descender.
Dálle ao play para escoitar as impresións previas ao partido de Chiqui Barros e Ana de Matías.
O Rosalía xa sabe o que é vencer ao MagecTías
O primeiro enfrontamento entre estes dous clubs chegou na décima xornada ligueira, adiada ata finais de xaneiro, disputada en terras galegas e con vitoria para as locais.
O axustadísimo 60-59 decidido no segundo final labrouse grazas a unha virtude que as novatas deben ter presente este sábado: saber sufrir. A loita pola permanencia está moi rifada e aguantar o ritmo é indispensable para acadar o obxectivo.
