As “balas vermellas” do Ría Ferrol seguirán sendo atletas de División de Honor. As galegas competiron na Liga Iberdrola de clubs de atletismo pola permanencia na máxima categoría, un obxectivo que lograron da mellor forma posible, rematando primeiras de grupo.
As ferrolás sumaron en Valladolid un total de 108 puntos, proclamándose como o mellor equipo dos loitadores pola salvación e manténdose na categoría unha tempada máis. O equipo galego sumou nesta última xornada, un total de dous ouros, sete pratas e un bronce.
Os resultados das atletas do Ría Ferrol
Un dos mellores resultados do Ría Ferrol chegaron da man de Elena Llobera, campioa na proba de lonxitude. A atleta colgouse o ouro nun podio moi disputado, no que superou á segunda clasificada en 0.09 e á teceira en 0.10 chegando a unha marca de 6.12.
O segundo ouro foi de Irene Bonafonte, campioa da proba dos 1.500 metros, cun tempo de 4:27.63, gañando por case dous minutos á segunda clasificada. Unha das numerosas pratas tamén foi obra de Bonafonte, no equipo que conforma con Lucía Rivadulla, Laura Alonso e Paula Ferreiros para o 4×400, no que remataron segundas.
Tamén subiu á segunda posición do podio Talia Mara Pérez, na proba dos 100 metros. Na dos 400 metros valos, Paulette Natacha Fernández quedou na segunda praza. Outra das pratas foi para Rocío Díaz, quen competiu no concurso de altura. Diaou Diallo foi así mesmo segunda na súa proba, a do triplo salto.
Finalmente, Xiana Lago foi segunda no lanzamento de peso de 4 kg, cunha marca de 12.61. A última prata do Ría Ferrol chegou grazas a Ivanna Carolina Román, na competición de lanzamento de xavelina de 600 g. Laura Alonso Da Costa foi a última en subir ao podio, cun bronce nos 800 metros.
Outras oito atletas tamén competiron, conseguindo resultados diversos pero fóra do poio. Inés Celorio foi quinta nos 200 metros, mentres que Lucía Rivadulla foi cuarta nos 400 metros. Silvia Guerra finalizou última, na oitava posición, nos 3.000 metros, e Paula González rematou cuarta nos 100 metros valos.
En lanzamento de pértega, Diana Jiménez foi quinta, e no lanzamento de martelo, María Oliva Amores foi cuarta. Finalmente, Iria Rivas tamén rematou cuarta nos 5.000 metros marcha e o equipo do 4×100, formado por Talia Mara Pérez, Paula González, Inés Celorio e Elena Llobera, foi quinto.
