O Ulla Oil Rosalía segue sorprendendo na Liga Feminina 2. Despois de non puntuar nas primeiras seis xornadas, e ser o claro colista da categoría, as xogadoras compostelás comezan a despegar. O conxunto dirixido por Chiqui Barros logrou a primeira vitoria contra a AD Cortegada e agora repite ante o HGB Ausarta Barakaldo EST.
O entón colista (empatado coa Agrupación Deportiva), chegaba á cita dunha derrota 69-71 contra o Azkoitia Azpeitia ISB, para enfrontarse ao sétimo clasificado, o Barakaldo. Casualidades da vida, as compostelás, ademais de dar a sorpresa e sumar os dous puntos, déronlle a volta ao resultado da xornada anterior e desta vez foron elas as que gañaron 69-71.
O conxunto vasco tamén chegaba dunha derrota contra outro galego, o Celta Zorka Recalvi, por unha diferenza de 21 puntos, que as facía perder unha posición. Con todo, o seu equilibro entre vitorias e derrotas (catro de cada unha), facía pensar que os dous puntos quedarían na casa.
Non foi así. O Rosalía mandou no partido desde os primeiros minutos, impoñendo sorprendentemente ben o seu xogo e logrando unha vantaxe clara sobre o seu competidor. Un esquema que se repetiu no segundo parcial, cun resultado moi similar e que fixo que o electrónico marcase ao descanso un 27-40 a favor das visitantes.
O panorama cambiou tras o paso por vestiarios. O Barakaldo reaccionou e logrou levarse o terceiro cuarto cunha diferenza de 11 puntos que as situaba a dous do empate. A efectividade das locais desde a liña de tres foi superior á das xogadoras de Chiqui Barros, pero o principal erro das visitantes estivo nos tiros libres. Cun porcentaxe de acerto do 48% fronte ao 60% local, o partido case se decide por estas estatísticas.
Porén, para os últimos dez minutos, as galegas lograron manter o ritmo do partido e loitar ata o final, asinando un empate no último cuarto que aseguraría a vitoria final. Dous puntos máis que afastan ás xogadoras do Rosalía do pozo da LF2.
Llegó la segunda.
Enhorabuena equipo!!!#VamosRosa pic.twitter.com/HFplQEC0P4— Rosalia FEDESA (@RosaliaFEDESA) November 29, 2020
FICHA TÉCNICA
69) HGB AUSARTA BARAKALDO EST: Aina Martin (13), Bintou Lo Sylla (6), Frank Uchendu (8), Ariana Lewis (11), Laura Chahrour (8) -cinco inicial-. Tamén xogaron: Aitana Vergara (-), Eva Ortega (-), Emma Karamovic (21), Beatriz Torres (-) e Nicole Murugarren (2)
71) ULLA OIL ROSALÍA: Carla García (6), Nuria Choren (15), Sara Corredoira (13), Ángela González (5), Cristina Soares (26) -cinco inicial-. Tamén xogaron: Ana de Matías (1), Paula Rivas (-), Blanca Manivesa (2), Nerea Liste (-) e Clara Riera (3).
PARCIAIS: 13-20, 14-20, 19-8 e 23-23
ÁRBITROS: Gorka García e Iñaki Luquin.
INCIDENCIAS: Partido correspondente á novena xornada da Liga Feminina 2 disputado no polideportivo Lasesarre en Barakaldo (Vizcaya).
