A COVID-19 estálle a pasar factura ao Atlético Guardés. Afortunadamente, as galegas non lamentan contaxios no seu plantel, pero os casos nos equipos rivais modifican por completo o seu calendario. Entre partidos previstos e novas datas, o club de balonmán terá, se a pandemia o permite, once partidos en 36 días.
Aos duelos xa acordados da Liga Guerreras Iberdrola e a eliminatoria da EHF European Cup, engádense o encontro adiado de Copa da Raíña co Zuazo e o partido ligueiro aprazado co Puerto del Carmen.
O maratón do Guardés comeza este mesmo sábado
Este sábado, 6 de febreiro, o Guardés viaxa a Cantabria para xogar a xornada 10 ligueira contra o Uneatlántico Pereda ás 20:00 horas. Así comeza o reto das galegas, que en cinco semanas terán partidos da competición regular, da Copa e da competición europea.
Na semana seguinte, as de Prades teñen dobre cita. O mércores 10 de febreiro, ás 20:00 horas en A Sangriña, as galegas recibirán ao Zubileta Evolution BM Zuazo, para celebrar o partido adiantado da undécima xornada de Liga. O motivo tras este cambio de data era que a orixinal coincide coa Eurocup. De todas formas, a confirmación da data aínda non é oficial, atendendo á evolución do brote de COVID-19 no plantel zuazotarra.
O domingo desa mesma semana, por fin, o Guardés debutará na competición europea esta tempada. Será en Ucraína, xogando co HC Galychanka Lviv a ida da eliminatoria.
Na semana do 15 de febreiro, o calendario repetirase. U nmércores disputarase a xornada 12 da Liga Guerreiras, desta vez ante o Aula Alimentos de Valladolid e a fin de semana estará reservada para o duelo ante as ucraínas. Concretamente, a volta será o domingo en A Sangriña ás 19:00 horas.
Para o mércores 24 de febreiro, o Guardés recuperará o partido adiado da sétima xornada contra o Rincón Fertilidad Málaga, ás 20:45 en A Guarda e ese sábado recibirá ao CICAR Lanzarote – Ciudad de Arrecife para xogar a xornada 13ª.
Esta é a axenda prevista do equipo do Baixo Miño, confiando en que desta vez o COVID-19 respecte a todos os equipos e poidan disputarse todas as competicións con normalidade.
