Catorce días despois da volta aos adestramentos, o Atlético Guardés xogará o primeiro partido do curso, cun amigable de pretempada ante Aula de Valladolid. O partido será o sábado, 14 de agosto, ás 18:00 horas en A Sangriña. As vallisoletanas serán tamén o primeiro rival das galegas na Liga Guerreras Iberdrola.
Á fronte do banco galego estará José I. Prades, quen se reincorpora á disciplina do Guardés esta mesma semana, despois de actuar como segundo adestrador das Guerreras nos Xogos Olímpicos de Toquio.
Partido gratuíto do Guardés
Este encontro amigable enmárcase dentro do programa das Festas do Monte de A Guarda. A entrada é de balde, pero cun aforo na Sangriña limitado ao 50% por mor da seguridade sanitaria, cuxo protocolo é preciso cumprir.
Para acceder ao partido é preciso recoller unha invitación no pavillón. Para iso, habilitaranse dúas franxas horarias:
- De luns a venres de 16:30 a 20:30 horas
- O sábado, de 10:00 a 14:00 horas
