A expedición ata Barakaldo do Conservas Orbe Rubensa Porriño presentábase como un reto, ao visitar as galegas ao Zubileta Evolution BM Zuazo, entón líder do grupo pola permanencia na Liga Guerreiras Iberdrola. Pero o conxunto de Isma Martínez está imparable e logrou, non sen esforzo, levarse a vitoria por un axustado 20-21.
As xogadoras do Conservas Orbe Rubensa Porriño tiveron que sufrir de principio a fin para sumar este trunfo, que as deixa como as segundas mellor clasificadas do seu grupo, a piques de chegar ao ecuador desta segunda fase da competición. Como líder da táboa está o Balonmano Salud Tenerife, con 14 puntos, só un máis que as xogadoras do equipo conserveiro.
O Bm. Zuazo golpeou primiero
O partido comezou cun gol tempraneiro de Maddi Bengoetxea para as locais. O Conservas Orbe Rubensa Balonmán Porriño saltou á pista vasca baixo de enerxías, mentres que o Zubileta Evolution BM Zuazo subiu pronto o ritmo nos ataques e nas defensas.
Porén, xogadoras do conxunto galego seguiron loitando e foron quen de empatar o partido primeiro cun 4-4 e despois cun 6-6, cando xa pasaran 15 minutos desde o inicio do encontro.
No equipo local, Anne Erauskin lideraba o ataque desde o extremo dereito, anotando cinco tantos. No aparatado da defensa, as vascas subiron a súa liña e exercían presión desde os laterais, complicando as ofensivas porriñesas.
Pola súa parte, o Conservas Orbe Rubensa Balonmán Porriño defendía xa con contundencia desde o centro, á vez que progresaba nos ataques, coas transicións e movementos rápidos de balón como a vía para xerar máis oportunidades. Co paso dos mintuos, as visitantes comezaron a tomar a vantaxe do partido e distanciarse das contrincantes. Porén, con Maddi Aalla baixo paos, o Zubileta Evolution Bm. Zuazo mantíñase dentro do encontro. A pausa chegou co 11-12, evitando o empate vasco nos últimos intres.
O Porriño asegurou a vitoria na segunda metade
Xa na segunda parte, o electrónico estaba completamente aberto, co campión do encontro aínda por decidir. O descanso sentoulle ben ao Conservas Orbe Rubensa Balonmán Porriño, que volveu á pista de Barakaldo con ganas e fortes cunha defensa 6:0. O Zubileta Evolution Bm. Zuazo non se quedaba descolgado, e pasados dez minutos desde a reanudación, o electrónico marcaba o 14-17.
O encontro seguía rifado, pero co Porriño á cabeza. Porén, co paso dos minutos as locais estaban cada vez máis preto e supoñían unha ameaza maior, cun parcial 2:0 que as poñía a un punto. Co perigo asomando, Isma Martínez solicitou un tempo morto para salvar o partido, pero as galegas erraron no ataque planeado. Entón, o adestrador rival, Joseba Rodríguez foi quen parou o reloxo, preparando unha xogada para o empate.
O plan establecido polo Zubileta Evolution Bm. Zuazo non se cumpriu, e as xogadoras do Balonmán Porriño puideron certificar a súa vitoria, importantísima nesta segunda fase pola permanencia. O resultado final foi dun 20-21.
FICHA TÉCNICA
20) ZUBILETA EVOLUTION BM ZUAZO: Estibaliz Velasco (2), Ainhoa Hernández (5), Alba Sánchez (2), Ariadna González, Isabel Fernández-Agustí, Maider Barros, Ana Arozamena, June Loidi (3), Ane Encina (1), Anne Erauskin (5), Naia Puigbo, Maddi Bengoetxea (2), Ariane Blázquez, Anne Romero, Magdalena Fernández – Agustí e Maddi Aalla.
21) CONSERVAS ORBE RUBENSA BM PORRIÑO: Alicia Campo (1), Andrea Amarilla, Érica Tavares (1), Inés Hernández (2), Soraia Lopes (4), Aitana Santomé, Arima López, Alba Dapena (1), Anthia Espiñeira (1), Sarai Samartin (2), Mónica Soares (6), Sandra Fernández (2), Carme Castro (1), Fátima Ayelén e Estela Carrera.
MARCADOR CADA CINCO MINUTOS: 2-1, 4-4, 6-6, 7-8, 9-10, 11-12, – descanso -, 12-15, 14-17, 14-18, 17-19, 18-21, 20-21.
ÁRBITROS: Eric Deiros e Jordi Pinilla. Por parte do Conservas Orbe Rubensa Bm Porriño excluíron a Alba Dapena e Mónica Oliveira. No bando do Zubileta Evolution Bm Zuazo, excluíron a Maider Barros.
INCIDENCIAS: Partido correspondente á 3ª xornada da segunda fase da no grupo pola salvación na Liga Guerreras Iberdrola de Balonmán feminino.
