Tras non poder competir a fin de semana pasada, o Conservas Orbe Rubensa BM Porriño retoma a Liga Guerreras Iberdrola recibindo ao Balonmano Salud Tenerife. A cita en terras galegas será o sábado, 6 de febreiro, ás 20:30 horas.
Este partido é moi importante para as locais, que buscarán gañar a un rival directo na clasificación da Liga Guerreras Iberdrola e co que empatou na primeira volta.
Isto non será tarefa doada. O Tenerife é “un equipo que cambiou moitísimo con respecto ao inicio de Liga. Cambiaron a moitísimas xogadoras. A verdade, é un equipo difícil de analizar porque cambia moito e só temos de referencia o que xogaron desde xaneiro ata agora”, resumía o adestrador galego Isma Martínez.
Na pasada xornada, as canarias perderon ante o Rocasa Gran Canaria no derbi, cun resultado final de 25-29. As entón locais non foron quen de poñerse por diante das visitantes en ningún momento do partido. Porén estiveron sempre rozándolle os talóns e poñendo contra as cordas ao líder do Grupo B.
Pola súa parte, o Porriño non puido disputar a xornada correpondente á pasada fin de semana. As galegas tiñan previsto xogar contra o Club Balonmano Morvedre, pero esta cita tivo que ser adiada. Un positivo no bando de Sagunto obrigou a aprazar o encontro.
O Porriño confía en dominar o ritmo para levarse o partido
As canarias, en palabras do adestrador do Porriño, son un conxunto que “quedou bastante corto no banco”. Algo que non debe facer que as galegas se confíen, xa que “aínda así teñen un bo sete, moi potente, cunha Rebeca López que está collendo moitísimo protagonismo”.
Outo dos aspectos no que o Tenerife é forte é o pivote, xa que “Leti Cobo é unha xogadora que é moi boa tanto ofensiva como defensivamente. Logo está a xuventude de xente como Zaldúa, Elena Martínez o Loscos, que están facendo moi bo papel. Ademais do nivel que están tendo en portería”, destaca Isma Martínez.
Isma Martínez: “Se en algo somos mellores é na amplitude do plantel”
Analizado o nivel do contrincante, o técnico considera que para facerse co partido, a clave estará “en subir o ritmo de xogo. Se en algo somos mellores é na amplitude do plantel”.
Despois do descanso forzado da última xornada, ao Porriño lle espera unha axenda chea de citas. “O calendario apretouse moito, pero todo comeza por sacar este partido o sábado. Para nós é un partido crucial, porque vendo que vai ser moi difícil acadar o cuarto posto, preséntase como básico sumar dous puntos”, declaraba o adestrador.
Isma Martínez: “É un partido crucial, porque vendo que vai ser moi difícil acadar o cuarto posto, preséntase como básico sumar dous puntos”
O encontro poderá seguirse vía streaming a través da canle de Youtube do Porriño.
DHF| Este sábado continuamos con la #LigaGuerrerasIberdrola ‼️
🆚 @BalonmanoSalud
⏰20:30
📍Pabellón Municipal de O Porriño
🔴En directo por YouTube#aRevolta pic.twitter.com/NimmCjiFHd— Club Balonmano Porriño (@BmPorrino) February 4, 2021
