O Conservas Orbe Rubensa Porriño segue dando pasos adiante para afianzar a súa permanencia. Desde o comezo da segunda fase, as galegas non fallaron en ningún partido, e coa vitoria na última xornada ante o Lanzarote Puerto del Carmen, por un 31-16, suman catro semanas sen perder.
Nesta cuarta xornada, as de Isma Martínez lideraron sobre a pista comodamente xogando como locais, e mantendo a raia en todo momento ás canarias. Co seu pleno de vitorias, o Conservas Orbe Rubensa BM Porriño é o primeiro clasificado do grupo pola permanencia, cun total de 15 puntos, un por riba do segundo clasificado e o terceiro.
O Porriño non dubidou no seu pavillón
O duelo deportivo comezou cunha acertada ofensiva do Balonman Lanzarote Puerto del Carmen, adiantándose no marcador no seu primeiro ataque. Pola súa parte, o Conservas Orbe Rubensa BM Porriño respondeu con contundencia nun dous contra dous no centro, no que Arima López converteu o seu lanzamento superando a meta rival e anotando.
O cadro local crecíase na cancha, destacando na defensa da zona central con Arima López e Andrea Amarilla, impedindo calquera ameaza das canarias. No bando contrario, a defensa tamén era férrea, cun sistema 6:0, que dificultaba moito os intentos de ataque do cuadro galego.
Aínda así, o equipo de Isma Martínez dobraba os puntos das rivais, cun marcador 8-4 no ecuador da primeira metade. Os intentos de Tamara Jovicevic e Beatriz Betancor pola remontada visitante non chegaban a porto, cunhas locais que souberon manter a raia ás rivais.
Co paso dos minutos, o Porriño aumentaba a súa renda, coa tranquilidade dun 15-8 a falta de cinco minutos para o descanso. O conxunto canario deixouno todo na pista antes da pausa, reducindo distancias cun parcial 0-3 e deixando o electrónico no 15-11 con toda a segunda parte por disputar.
No segundo tempo, o club local logrou setenciar o duelo. Nos primeiros minutos, o Balonmano Lanzarote Puerto del Carmen continuou coa enerxía da fin da primeira metade, pero o plantel de Isma Martínez aumentou o ritmo en defensa impedindo a remontada visitante.
A falta xa de quince minutos para a bocina final, o Conservas Orbe Rubensa BM Porriño vencía por nove goles, nun 23-14, cun alto ritmo anotador a base de contraataques. As deportistas canarias non se rendían e o seu adestrador, Miguel Ángel Lemes, solicitou en dúas ocasións un tempo morto para insuflarlles enerxía coas súas verbas e darlles novas indicacións para as súas evolucións sobre a cancha. Porén, as visitantes non souberon saír do bucle de erros, e as galegas aproveitaron para afianzar unha importantísima vitoria.
Co pitido final, o marcador anunciaba o 31-16, no que era xa a cuarta vitoria consecutiva, un trunfo absolutamente vital para acadar o obxectivo do conxunto do Porriño de asinar a salvación na Liga Guerreras Iberdrola.
Podes volver a desfrutar da vitoria do Conservas Orbe Rubensa BM Porriño por 31-16 aquí:
FICHA TÉCNICA
31) CONSERVAS ORBE RUBENSA BM PORRIÑO: Alicia Campo, Andrea Amarilla, Érica Tavares (5), Inés Hernández (4), Soraia Lopes (6), Aitana Santomé (2), Arima López (1), Alba Dapena (1), Anthia Espiñeira (2), Sarai Samartin (3), Mónica Soares (2), Sandra Fernández (2), Carme Castro (3), Fátima Ayelén e Estela Carrera.
16) LANZAROTE PUERTO DEL CARMEN: Suely Pinto (2), Kenia Hernández (1), Beatriz Betancor (1), Lucia Betancort (1), Atteneri Morales, Madeleine Cortez, Mónica Cabrera, Antonella Piantini, Caterina Benedetti (2), Carla Hernández (2), Tamara Jovicevic (5) e Sladjana Topic (2).
MARCADOR CADA CINCO MINUTOS: 2-1, 4-3, 8-4, 12-6, 15-8, 15-11 – descanso -, 18-12, 19-13, 23-14, 24-15, 28-15, 31-16.
ÁRBITROS: Francisco Fernández e Adrián Rodríguez. No Conservas Orbe Rubensa Bm Porriño excluíron a Andrea Amarilla e Anthia Espiñeira. Mentres que polo Lanzarote Puerto del Carmen excluíron as xogadoras: Atteneri Morales, Carla Hernández, Tamara Jovicevic e Sladjana Topic.
INCIDENCIAS: Partido correspondente á 4ª xornada da segunda fase da no grupo pola salvación na Liga Guerreras Iberdrola de Balonmán feminino.
