O Conservas Orbe Rubensa BM Porriño segue loitando por permenecer na Liga Guerreiras Iberdrola e gañar a un rival directo é un paso fundamental na consecución deste obxectivo. As galegas o conseguiron este martes, na recuperación da novena xornada ante o Club Balonmano Morvedre (20-21).
O adestrador do conxunto do Porriño, Isma Martínez, xa o advertía na previa: “Estes dous puntos poden ser claves de cara á segunda fase“. O conxunto galego precisaba unha vitoria e atopouna na cancha do CB Morvedre.
O BM Porriño reaccionou a tempo
Desde os primeiros instantes e durante a maior parte do encontro, o CB Morvedre foi quen levou as rendas do partido. O inicio foi complicado para ambos equipos. O cadro local adiantouse primeiro, pero trascurridos dez minutos o 2-2 marcaba a igualdade sobre o marcador.
A defensa valenciana melloraba co paso dos minutos e a súa porteira, María Aguas, impedía que o Conservas Orbe Rubensa BM Porriño tivese opcións de desmarcarse. O equipo galego loitaba por alcanzar no luminoso ás rivais, pero estas aumentaban cada vez máis a súa vantaxe.
Os erros nos pases e nos lanzamentos por parte do conxunto visitante permitiu que o CB Morvedre aproveitase o mal momento do contrincante para distanciarse. Así chegou o tempo de descanso, cun 13-8 no marcador.
A segunda parte presentouse como unha continuación da primeira, cun equipo local máis acertado que o visitante. Ambos conxuntos demostraban un nivel similar sobre a pista, pero o maior acerto das valencianas permitíalles ir por diante. Unha defensa contundente e un ataque calmado facía imposible para as galegas iniciar a remontada.
Porén, xa no ecuador desta segunda metade, o Conservas Orbe Rubensa BM Porriño espertou e pisáballe os talón ás locais cun 16-15. As galegas aumentaron o ritmo de xogo e cun gran parcial 2-6 puxéronse por primeira vez por diante.
Co susto no corpo, as locais seguían pelexando por non deixar escapar a vitoria e a tensión respirábase sobre a pista. A balanza inclinouse finalmente a favor das xogadoras galegas, grazas a un tanto de Mónica Soares, que poñía o 20-21. Ante este resultado, a adestradora local, Montse Puche, viuse obrigada a solicitar un tempo morto para organizar a última xogada do partido.
O CB Morvedre preparouse, pero fallou. Fátima Ayelén logrou frear o lanzamento valenciano e certificar a vitoria galega. Malia o dominio das locais durante case todo o partido, o acerto e efectividade do BM Porriño nas últimas xogadas fíxoo merecedor dos puntos da vitoria.
Tras este partido, as galegas que adestra o técnico Isma Martínez ocupan a sexta posición na táboa clasificatoria, con sete puntos e o CB Morvedre unha menos, a sétima, con tres puntos.
FICHA TÉCNICA
20) CLUB BALONMANO MORVEDRE: Sonora Solano, Carmen Toscano (3), Andrea González (1), Lorena Zarco, Sara Fushu (1), Carolline Dias, Esther Lacueva (1), Judit Gómez, Lorena Montilla, María Gil, Cristina Polonio (3), Lucía Gámez (3), Nayla de Andrés (1), Helena Martín (2), María Aguas e Juliana Borges (5).
21) CONSERVAS ORBE RUBENSA PORRIÑO: Ana Cerqueira (3), Alicia Campo, Érica Tavares (3), Inés Hernández, Soraia Lopes (4), Aitana Santomé, Arima López (1), Alba Dapena (1), Anthia Espiñeira (2), Sarai Samartín (2), Mónica Oliveira (4), Sandra Fernández, Carme Castro (1), Fátima Ayelén, Estela Carrera e Begoña Otero.
MARCADOR CADA 5 MINUTOS: 1-0, 2-2, 4-3, 6-5, 8-7, 13-8, – descanso – ,14-9, 16-12, 16-15, 19-16, 20-18, 20-21.
ÁRBITROS: Miguel Martin e David Monjo. Por parte do Conservas Orbe Rubensa Bm Porriño excluíron a Érica Tavares, Inés Hernández, Anthia Espiñeira e Sarai Samartín. No Club Balonmano Morvedre excluíron a Carmen Toscano, Lorena Zarco, Sara Fushu e Cristina Polonio.
INCIDENCIAS: Partido correspondente á novena xornada la Liga Guerreras Iberdrola de balonmán.