Hoxe mércores 21 de decembro, ás 20:30 no Pavillón Municipal do Porriño, enfrontaranse o Conservas Orbe Rubensa Bm Porriño e o Super Amara Bera Bera. O encontro corresponde coa novena xornada da Liga Guerreras Iberdrola e enfronta a dous dos equipos da zona alta da táboa na categoría. O encontro vaise transmitir pola canle de YouTube do Porriño.
O Super Amara Bera Bera vén de gañar a Supercopa de España diante do Costa del Sol Málaga pola mínima (25-26) este domingo, 18 de decembro. En canto ao papel que están a desempeñar na liga Guerreras Iberdrola, o último encontro foi contra o Mecalia Atlético Guardés o día 16 e onde as donostiarras se impuxeron por un resultado de 27-23. Atópanse segundas na clasificación cun total de 14 puntos. O líder é o Rocasa Gran Canaria.
Coa mesma puntuación ca o Bera Bera, pero cun partido máis está o Conservas Orbe Rubensa Bm Porriño no terceiro posto. O seu último encontro foi contra o Sporting Grafometal La Rioja no partido adiantado da xornada 10 e onde as porriñesas sufriron, pero terminaron sumando dous novos puntos (26-21).
De gañar ao Super Amara Bera Bera o conxunto galego podería alcanzar ao Rocasa Gran Canaria no liderato.
Ao ser o último partido do 2022 para as do Porriño e dadas as condicións nas que se atopa o equipo galego en Liga, o primeiro adestrador do Conservas Orbe Rubensa Bm Porriño, Ismael Martínez destacaba “é un partido para gozalo e gozar o momento no que estamos. Ademais, a clasificación di que o que gañe ponse por encima, pois ao final tamén para competilo” e engadía a ilusión que xera “non podiamos imaxinar unha situación como esta ao principio de Liga, por iso esperamos poder sacar os dous puntos en casa para pechar un ano que está a ser fantástico”.
Ismael Martínez, adestrador do BM Porriño: “Non podiamos imaxinar unha situación como esta ao principio de Liga, por iso esperamos poder sacar os dous puntos en casa para pechar un ano que está a ser fantástico”
Con todo, a vitoria non garante ás do Porriño rematar o ano líderes. O vindeiro mércores, día 28 de decembro, o cruce será xustamente entre o Super Amara Bera Bera e o Rocasa Gran Canaria.
Ismael Martínez, técnico do Porriño: “Tivemos máis tempo para preparar o partido”
Ao analizar o encontro do mércores, Ismael Martínez admitía que si se atopaban cunha pequena vantaxe con respecto ao seu rival, “tivemos máis tempo a preparar o partido”. Con todo, é consciente a calidade das vascas “son unha das mellores de División de Honra. Leva moitos anos facendo as cousas moi ben”.
Ismael Martínez, adestrador do Conservas Orbe Rubensa BM Porriño, é consciente da entidade do rival: “son unha das mellores de División de Honra. Leva moitos anos facendo as cousas moi ben”
En canto ao aspecto máis técnico, resaltaba: “teñen unha defensa moi sólida e forte en zona central, tamén poden defender aberto e lévano feito contra varios rivais”. Considera que as claves que lle poden axudar a levar o partido son ”temos que tentar minimizar os erros e estar moi xuntas en defensa para non permitir o seu xogo”.
O adestrador das galegas, Ismael Martínez, di do Super Amara Bera Bera: “Teñen unha defensa moi sólida e forte en zona central, tamén poden defender aberto e lévano feito contra varios rivais”
Ismael Martínez anima a toda a afección a ver este partido e é consciente de que o factor do público é algo que anima moito. “Esperamos ter un bo ambiente no pavillón, que a xente veña. Ver o pavillón como o vimos contra o Guardés ou o Valladolid”.
No conxunto rival son conscientes de que visitan a cancha dun equipo que está en forma e demostrando a súa candidatura a manterse firme na zona nobre da táboa na Liga Guerreras Iberdrola. Con todo, a xogadora do Super Amara Bera Bera Maddi Aalla recoñecía que “mentalizarse é difícil logo do subidón da Supercopa” pero aseguraba que segundo van pasando as horas as xogadoras do conxunto guipuzcoan vanse “concentrar no partido”. Na opinión da porteira de Gorliz, “o máis importante é saír ao 100% desde o inicio”.
Maddi Aalla, xogadora do Super Amara Bera Bera e internacional coa Selección Española: “O máis importante é saír ao 100% desde o inicio”
Para este cruce é dúbida Paula Arcos xa que ten tocado ligamento do seu polgar dereito.
