A primeira fase da Liga Guerreras Iberdrola rematará esta fin de semana coa 14ª xornada e nela o Conservas Orbe Rubensa BM Porriño visitará ao KH-7 Bm Granollers, o líder do Grupo B. O partido será o sábado, 6 de marzo, ás 19:00 horas no Palau D’Esports de Granollers.
Este encontro non será relevante para a clasificación xa que, tal e como sinala o adestrador galego Isma Martínez, “por como está configurada a Liga, xa está decidido quen vai xogar nun lado e noutro”.
Isma Martínez: “Xa está decidido quen vai xogar nun lado e noutro”
Por iso, no Porriño xa miran máis alá desta primeira fase, a cuxo último partido “imos un pouco tocadas porque cargamos bastante esta semana, con vistas a chegar ben á semana seguinte”.
A falta dun partido por disputar, as de Martínez ocupan asexta posición, con nove puntos, a cinco do penúltimo, o Morvedre, e seis do Adesal Córdoba, o colista, última vítima do Porriño. Algo máis preto está o quinto clasificado, o Balonmano Salud Tenerife, só un punto por riba.
O último rival do Porriño na primeira fase
Mellor situado está o rival desta xornada, o Granollers. Con 10 vitorias, un empate e só dúas derrotas, as catalás son as primeiras clasificadas do Grupo B.
A este partido chegan tamén dunha vitoria, no seu caso ante o Rocasa Gran Canaria, cun axustado resultado final de 28-30. Tras este duelo, suman xa 21 puntos.
Segundo Isma Martínez, o conxunto que actuará como local destaca por estar facendo “unha tempada excepcional. É un equipo moi ben formado, con xente moi contrastada na Liga como Giulia Guarieiro ou Mireia Torras“. En poucas palabras: “é un equipo xoven, con moita proxección e que está facendo moi ben as cousas”.
Isma Martínez: “Tennos que valer para coller ritmo e confianza”
Ante este panorama, o adestrador admite que no Porriño vése este duelo como “unha preparación” para o que as enfrontará o día 13 ao Aula Alimentos de Valladolid. “Tennos que valer para coller ritmo e confianza”, apunta Martínez.
O encontro poderá seguirse vía streaming a través do Youtube do Granollers.
