O Conservas Orbe Rubensa Porriño é terceiro na loita por evitar o descenso e quere seguir sumando para afianzar o seu lugar na Liga Guerreiras Iberdrola. Nesta nova xornada, a terceira da segunda fase, as galegas teñen un reto por diante: vencer ao Zubileta Evolution Bm. Zuazo, líder da clasificación. A cita será o sábado, 10 de abril, ás 19:30 horas no polideportivo Lasessarre.
O adestrador galego, Isma Martínez, advirte que nada está decidido nesta competición, polo que este é “un partido no que quen gane terá unha maior tranquilidade”.
Isma Martínez: “Xoga realmente ben, e domina moi ben as transicións cunha boa defensa moi proactiva que lle permete recuperar moitos balóns”
O adestrador vaticina un encontro “complicado”, xa que ve ao BM Zuazo como o rival “co plantel máis completo”. Sobre o conxunto rival, Martínez asegura que “xoga realmente ben, e domina moi ben as transicións cunha boa defensa moi proactiva que lle permete recuperar moitos balóns. Ademais, viven moito do gol tras roubo e incluso do contragolpe”.
Por iso, o técnico do Porriño considera que o camiño á vitoria pasará por dominar as transicións e facer un bo repregamento, parando así os puntos fortes das rivais. Martínez destacou tamén a xogadoras como June Loidi, Ainhoa Hernández ou Alba Sánchez entre outras.
O Poio e o Zuazo chegan con traxectorias distintas, pero preto na clasificación
O técnico galego asegura que o rival do Porriño desta xornada “partía con moitísima vantaxe ao inicio da Liga, pero está visto que aquí non se vai salvar ninguén de forma doada. O obxectivo era intentar alacanzalas e non contabamos con ter a oportunidade tan pronto”.
Isma Martínez: “Está visto que aquí non se vai salvar ninguén de forma doada”
No que vai de segunda fase, o conxunto galego suma dúas de dúas vitorias, vencendo a Uneatlántico Pereda e San José Obrero. Así, o Porriño acumula 11 puntos, sendo terceiro e só a un do segundo e do primeiro.
O líder é o Zuazo, quen está a ofrecer unha peor cara que na primeira fase. Polo de agora, as vascas só coñecen a derrota, e sobreviven na primeira posición cos puntos obtidos na primeira parte competitiva.
Esta será unha oportunidade de ouro para que o Porriño asegure a súa permanencia, cando o ecuador da segunda fase está a volta da esquina. Segundo apunta o propio adestrador, “todos os partidos que estamos xogando estamos buscando esa tranquilidade, porque a xente está apretando moitísimo por debaixo”.
O encontro poderá seguirse vía streaming a través do Youtube do BM. Zuazo.
