A primeira fase da Liga Guerreiras Iberdrola remata este martes para o Conservas Orbe Rubensa BM Porriño. As galegas recuperan ás 20:00, no pavillón municipal de O Porriño, o partido da 12ª xornada ante o Rocasa Gran Canaria.
A data orixinal deste encontro era a finais do mes de febreiro, pero unha serie de casos de COVID-19 no plantel das canarias obrigou a adiar o partido.
Isma Martínez: “Este partido ten que servir para repoñernos, mellorar e para afrontar a segunda fase con outras sensacións”
Segundo o adestrador do cadro galego, Isma Martínez, este duelo xa non terá relevancia na clasificación, pero debe servir para “repoñernos do mazazo que supuso a eliminación de Copa. Creo que tiramos un traballo de 105 minutos nos últimos 15. Este partido ten que servir para repoñernos, mellorar e para afrontar a segunda fase con outras sensacións”.
Así chegan ambos equipos
Este será un rival complicado para o Porriño. O Rocasa chega dunha vitoria ante o Liberbank Gijón, cun resultado 17-25, que lle permitiu subir á segunda praza. Actualmente suman 21 puntos.
En palabras do técnico galego, este é un equipo “con moitísimo lanzamento. Quizais sexan o equipo con máis lanzamento da Liga”.
Isma Martínez: “Quizais sexan o equipo con máis lanzamento da Liga”
Pola súa parte, o conxunto de Isma Martínez caeu derrotado ante o líder, o KH-7 BM Granollers, por un axustado 27-22. Desta forma, as porriñesas ocupan a sexta posición, con nove puntos.
Ademais, para esta cita, o adestrador non poderá convocar ás internacionais: Mónica Soares, Érica Tavares e Carme Castro. “Temos as baixas das internacionais, pero aproveitamos para subir ás xuvenís para que collan minutos e demostren que están preparadas para aportar no caso de que fose necesario”, declara Martínez.
Como ver o partido do Porriño
O público poderá desfrutar en directo deste partido desde o pavillón do Porriño. As persoas socias deben reservar a súa entrada enviando un correo a socios.bmporrino@gmail.com, co seu nome, apelidos, DNI e teléfono.
As persoas interesadas en ver o encontro, pero que non poidan acudir, poderán seguilo vía streaming a través da canle de Youtube do Porriño.
