O camiño do Conservas Orbe Rubensa BM Porriño para asegurar a permanencia na Liga Guerreiras Iberdrola comezou esta fin de semana e o fixo con vitoria. As galegas impuxéronse a domicilio ao Uneatlántico Pereda, ao que venceron por un 20-27.
Este é un trunfo que vale dobre. As cántabras chegaban a esta segunda fase con tres puntos menos que as galegas, polo que as de Isma Martínez vencen a un rival directo e escapan polo de agora do descenso. “É un partido clave a nivel clasificación”, declaraba no postpartido Alicia Campo. Unha análise coa que coincide a súa compañeira Claudia Kaulback: “Supón un subidón a nivel mental”.
O Porriño foi de menos a máis
Os primeiros intres do encontro foron complicados para o Uneatlántico, que actuaba de local. O Porriño colleu unha boa dinámica desde o primeiro minuto, conseguindo unha importante vantaxe no marcador.
As galegas de Isma Martínez conseguían dobregar á defensa 5:1 das cántabras, que non podían frear os ataques galegos. No apartado defensivo das visitantes, a porteira Fátima Ayelén brillou baixo paos, mantendo a raia ao Uneatlántico.
O control do partido estaba en mans do Porriño ata o ecuador da primeira parte, cando Santi Abascal, adestrador local, solicitou un tempo morto. A falta de dez minutos para o descanso, o Uneatlántico Pereda foi quen de empatar o partido, grazas sobre todo a Belén Sáez.
Porén, para o descanso o marcador informaba do 8-14, unha diferenza obtida co parcial 1-7 a favor do Porriño, desmarcándose de novo das locais.
Para a segunda parte, as galegas saltaron á pista coa mente posta en afianzar o trunfo. Así, os primeiros minutos marcaron a diferenza cara o desenlace final. O obxectivo da defensa galega centrouse nas primeiras liñas do Uneatlántico, combinado cun bo ataque da man de Soraia Lopes, que anotou 10 tantos para o Porriño.
A medida que as de Martínez crecían, o cadro local minguaba. Unha mala selección dos lanzamentos perxudicou ao Uneatlántico, á vez que se complicaba en defensa. Para a metade da segunda parte, as galegas vencían por cinco puntos, anotando sen problemas ante unha defensa local mellorada.
O final do partido chegou co 20-27 no marcador, cun Porriño que se sitúa na terceira posición da clasificación con nove puntos.
Revive o partido dándolle ao play!
As galegas non poden ceder puntos en casa na seguinte xornada
A seguinte cita será en casa, ante o San José Obrero, o 3 de abril, ás 18:00 horas. Outro partido importante para a permanencia, como recoñecen as xogadoras galegas Alicia Campo e Claudia Kaulback.
A pivote sinala que xogando como locais “non podemos deixar escapar puntos” e que a defensa será clave ante un equipo “con moito lanzamento e ritmo rápido”.
Alicia Campo: “Non podemos deixar escapar puntos”
Pola súa parte, a canterana Kaulback coincide en sinalar o poderío anotador do rival, actualmente cuarto clasificado, polo que considera que “hai que ter moita intensidade en defensa para estar aí neses lanzamentos”.
FICHA TÉCNICA
20) UNEATLÁNTICO PEREDA: Danielle de Sousa, Sandra Rodríguez, Andrea Pellón, Lydia Blanco, Sheila Enid Hiraldo (4), Ana Barquín, Paula González (2) – sete inicial -. Tamén xogaron: Leire Xotchilt, Aida Brull (2), Belén Sáez (6), Alba Fernández (2), Zuleika Fuentes (1), Isaura De Almeida (1), Marina González (2), Marta Sainz e Sol Ceballos.
28) CONSERVAS ORBE RUBENSA PORRIÑO: Alicia Campo, Andrea Amarilla, Érica Tavares (5), Inés Hernández (3), Soraia Lopes (10), Aitana Santomé, Arima López (1) – sete inicial -. Tamén xogaron: Alba Dapena, Claudia Kaulback (1), Anthia Espiñeira (3), Sarai Samartin (1), Mónica Oliveira (2), Sandra Fernández, Carme Castro (1), Fátima Ayelén e Estela Carrera.
MARCADOR CADA CINCO MINUTOS: 0-3, 2-4, 3-6, 6-7, 8-9, 8-14, – descanso -, 10-16, 13-19, 15-20, 16-23, 17-25, 20-27.
ÁRBITROS: Enrique Javier Romero e José Alberto Romero. Por parte do Conservas Orbe Rubensa Bm Porriño excluíron a Andrea Amarilla, Inés Hernández, Aitana Santomé e Arima López. Polo Uneatlantico Pereda excluíron a Sheila Enid Hiraldo, Leire Xotchilt e Alba Fernández.
INCIDENCIAS: Partido correspondente á 1ª xornada da segunda fase da Liga Guerreras Iberdrola disputado no pavillón Municipal do Porriño.
