Oito equipos loitarán desde esta fin de semana por non descender da Liga Guerreiras Iberdrola, e entre eles esta o Conservas Orbe Rubensa BM Porriño. As galegas visitan ao Uneatlántico Pereda na primeira xornada desta segunda fase, que se celebrará o sábado, 27 de marzo, ás 20:00 horas.
“Para nós é un partido trascendental. Seguramente, elas o teñan como un dos partidos máis importantes e seremos un dos rivais aos que queren alcanzar, xa qeu marcamos un pouco a zona da permanencia”, reflexiona o técnico galego Isma Martínez.
O Balonmano Porriño chega da primeira parte da competición con sete puntos, xa que no Grupo B finalizou na sexta posición. Pola súa banda, o Uneatlántico foi o penúltimo clasificado do Grupo A, e só conta con catro puntos arrastrados da primeira fase.
A análise de Isma Martínez, técnico do Porriño
Para o adestrador que nesta xornada será visitante, as claves do encontro ante as cántabras pasan por controlar o ritmo de xogo. “Temos que xogar con calma e ao noso ritmo. Debemos intentar levar o partido a un ritmo de posesións alto”, comenta Isma Martínez.
Isma Martínez: “Debemos intentar levar o partido a un ritmo de posesións alto”
Do conxunto rival, o adestrador do Conservas Orbe Rubensa BM Porriño, sinala as súas pivotes, e unha primeira liña “cunha mistura e fintadoras e lanzadoras”. En liñas xerais, o Uneatlántico é “un equipo que ten unha defensa posicional con moita envergadura e Sol Ceballos en portería está facendo unha moi boa tempada”.
Mirando ao seu propio banco, o adestrador resalta o traballo das xogadoras do Porriño malia os resultados. Martínez considera que este encontro, ao ser o primeiro da fase pola permanencia, “vai marcar un pouco a calma que poidamos ter ou o estar apretadas no que resta”.
Para o partido, a única baixa confirmada é a de Ana, mentres que o resto do grupo traballa con normalidade. “Temos que demostrar que o traballo é bo e debemos intentar quedar o máis arriba posible”, finaliza Isma Martínez, adestrador do Conservas Orbe Rubensa BM Porriño.
Este encontro, que se celebrará no pavillón polideportivo exterior de La Albericia, poderá seguirse vía streaming a través do Youtube do Uneatlántico Pereda.
