A pasada fin de semana o Conservas Orbe Rubensa BM Porriño xogábase a clasificación para competir na Copa da Raíña no pavillón Huerta del Rey ante o Aula Alimentos Valladolid. Finalmente, tras caer derrotadas polas vallisoletanas por un 29-25, as galegas non xogarán a Copa.
Inicialmente, este partido estaba axendado para o 30 de xaneiro, pero o Aula Alimentos detectou unha serie de casos positivos en COVID-19, polo que tivo que se adiar.
O encontro estivo marcado na súa primeira metade pola igualdade na pista entre ambos conxuntos. Porén, as locais souberon impoñerse na segunda parte, para ser as sextas clasificadas para a Copa da Raíña.
Primeira parte igualada
O Conservas Orbe Rubensa BM Porriño foi o primeiro equipo en atacar, pero o fixo cun lanzamento fallido. Lonxe de que isto baixase a súa concentración, a partir dese momento as galegas aumentaron o ritmo, poñendo ao Aula Alimentos contra as cordas.
Así, nos primeiros minutos, malia que a igualdade era a tónica xeral, o Porriño lograba unha lixeira vantaxe de dous puntos, unha vez transcurridos dez minutos. O ataque das visitantes baseábase no movimento de balón nas primeiras liñas, creando ocasións favorables para convertir en goles.
Anthia Espiñeira liderou ao conxunto galego, sendo a máxima anotadora do seu equipo, e dirixindo ás súas compañeiras desde o central. O cadro de Isma Martínez seguía por diante e sendo superiores ata que, a falta de dez minutos para o descanso, o Aula Alimentos reaccionou recortando distancias e ameazando con alcanzar ás galegas.
Tal foi así, que a renda conseguida polas visitantes ao longo da primeira parte perdeuse xusto para a pausa, xa que as vallisoletanas conseguiron empatar o encontro no seu ecuador (16-16).
Os erros en ataque castigaron ao Porriño
O resultado estaba completamente aberto, pero o feito de ter perdido a vantaxe tan duramente traballada ao longo da primeira parte afectou de cheo ás galegas.
Os fallos nos pases comezaron a aumentar á vez que o acerto esvaecíase nos lanzamentos. O Porriño entrou nun bucle de erros que acabarían por pasarlle factura.
Porén, conseguiron manter o pulso coas locais, ata que, a quince minutos do final, o Aula Alimentos Valladolid viu a súa ocasión de desmarcarse das galegas. Por primeira vez puxéronse por riba das visitnates, á vez que as de Isma Martínez estaban perdidas xa en ataque como en defensa.
Xa non había reacción que valese. Os tempos mortos pedidos polo adestrador ou os cambios realizados non modificaron nin a actitude nin a efectividade do Conservas Orbe Rubensa BM Porriño sobre a pista, que vía como o partido se lle escapaba.
Finalmente, o Aula Alimentos Valladolid certificou a remontada, cun resultado de 29-25, que lle serve para ser o sexto clasificado nesta edición da Copa da Raíña.
FICHA TÉCNICA
29) AULA ALIMENTOS VALLADOLID: Elba Álvarez (4), Jimena Laguna (2), Danila So Delgado (4), Francisca Parra, Ángela Nieto (3), Cristina Cifuentes, Lorena Téllez (1) – sete inicial -. Tamén xogaron: Mireia Díez, Fátima Ezzahraa, Teresa Álvarez (1), Sara Moles (4), Elena Cuadrado (2), Rafaela Bergara, Amaia González (4), Carmen Sanz e Lourdes Guerra.
25) CONSERVAS ORBE RUBENSA PORRIÑO: Alicia Campo, Andrea Amarilla, Érica Tavares, Inés Hernández (3), Soraia Lopes (5), Aitana Santomé, Arima López (2) – sete inicial -. Tamén xogaron: Alba Dapena (2), Claudia Kaulback, Anthia Espiñeira (6), Sarai Samartín (1), Mónica Soares (4), Sandra Fernández (1), Carme Castro (1), Fátima Ayelén e Estela Carrera.
MARCADOR CADA CINCO MINUTOS: 2-2, 5-7, 7-11, 10-11, 12-12,16-16, – descanso -, 18-18, 20-19, 22-20, 25-21, 27-23, 29-25.
ÁRBITROS: Oscar Gutiérrez e Jorge Monjo. Excluíron as xogadoras Érica Tavares, Inés Hernández, Aitana Santomé, Mónica Soares e Carme Castro por parte do Porriño; e a Jimena Laguna, Lorena Téllez, Sara Moles e Elena Cuadrado por parte do Aula Alimentos Valladolid.
INCIDENCIAS: Partido correspondente á volta da segunda ronda clasificatoria para a XLII Copa da Raíña de balonmán feminino.
